जिदान फ्रान्सका नयाँ मुख्य प्रशिक्षक

फ्रान्सका फुटबल महानायक जिनेदिन जिदान राष्ट्रिय टोलीका नयाँ मुख्य प्रशिक्षक नियुक्त भएका छन् । फ्रेन्च फुटबल महासंघले मंगलबार उनलाई चार वर्षका लागि नियुक्त गरेको हो ।
दिदिएर देसाँको ठाउँमा ५४ वर्षीय जिदानलाई मुख्य प्रशिक्षक बनाइएको हो । विश्वकपमा सेमिफाइनलबाट बाहिरिएपछि फ्रान्स चौथो स्थानमा सीमित भएको थियो । देसाँको अन्तिम खेल इंग्ल्यान्डसँग ६–४ ले हारिएको खेल थियो ।
जिदानले भने, ‘फ्रान्सको राष्ट्रिय टोली सम्हाल्नु नै मेरो सबैभन्दा ठूलो चाहना थियो ।’
उनले थपे, ‘रियल म्याड्रिड छाडेपछि मैले कुनै क्लबको जिम्मेवारी लिइनँ, किनभने मेरो लक्ष्य फ्रान्सको टोली सम्हाल्नु थियो । देसाँले जनवरी २०२५ मा पद छाड्ने निर्णय गरेपछि म नै उनको उत्तराधिकारी बन्न चाहन्थें । महासंघका अध्यक्षसँग भेट भयो र सहमति भयो ।’
जिदानले आफ्नो पहिलो खेल यूईएफए नेसन्स लिगअन्तर्गत टर्कीविरुद्ध खेल्नेछन् । त्यसपछि अक्टोबर २ मा फ्रान्सले घरेलु मैदान स्टेड द फ्रान्समा इटालीसँग खेल्नेछ ।
देसाँले १४ वर्षसम्म फ्रान्सको प्रशिक्षण सम्हाले । उनले १८५ खेलमध्ये १२० खेल जिताए । उनको नेतृत्वमा फ्रान्सले २०१८ को विश्वकप, २०२०–२१ को नेसन्स लिग तथा युरो २०१६ र विश्वकप २०२२ मा उपविजेता बनेको थियो ।
जिदान र देसाँ सन् १९९८ मा फ्रान्सलाई पहिलो विश्वकप जिताउने टोलीका सदस्य थिए । सोही वर्ष जिदानले बालोन डीओर पनि जितेका थिए ।