नेपाल आयल निगमको कार्यकारी निर्देशकमा नागेन्द्र साह नियुक्त

काठमाडौं । सरकारले नेपाल आयल निगम लिमिटेडको कार्यकारी  निर्देशकमा नागेन्द्र साहलाई नियुक्त गरेको छ । बुधबार बसेको मन्त्रिपरिषद् बैठकले धनुषा स्थायी घर भएका साहलाई खुल्ला प्रतिस्पर्धाबाट आगामी ४ वर्षका लागि कार्यकारी निर्देशकमा नियुक्त गरेको हो । चण्डिकाप्रसाद भट्टले  गत बैशाख ३० गते पदबाट राजिनामा दिएपछि रिक्त रहेको पदमा साह नियुक्त भएर आएका हुन् । साहले बिहीबार सपथ ग्रहण गरी पदभार ग्रहण गरेका छन् । उद्योग, वाणिज्य तथा आपूर्ति मन्त्रालयले खुला प्रतिस्पर्धामार्फत प्रबन्ध निर्देशक छनोट प्रक्रिया अघि बढाएकोमा अन्तिम ३ को सूचीमा परेका साहलाई निगमको जिम्मेवारी दिइएको हो ।

अन्तिम प्रतिस्पर्धामा साहसँगै कौशल केसी र सञ्जीवकुमार देव सिफारिसमा परेका थिए । धनुषाको नगराइन नगरपालिका–३ निवासी चार्टर्ड एकाउन्टेन्ट साह निगममा करिब १९ वर्ष सेवा गरेर गत जेठमा सेवा निवृत्त भएका थिए । उनी भट्टको राजिनामापछि केही समय निमित्त कार्यकारी निर्देशक पनि बनेका थिए । भट्टले राजीनामा दिएपछि रिक्त रहेको पदमा साहले झण्डै तीन महिना निमित्तको जिम्मेवारीमा रहेर काम गरेका थिए । साह अवकास भएपछि दीपक बराललाई निमित्तको जिम्मेवारी दिइएको थियो ।