‘कोही किन बरबाद होस्’ को फिल्मान्तरण प्रतीक्षा

नेपाली चलचित्रका ‘भीष्मपितामह’ नीर शाह र वरिष्ठ कलाकार रमेश बुढाथोकीको सहकार्य हुनु आफैंमा एउटा सुखद संयोग हो । झण्डै १२ वर्षपछि निर्देशनमा फर्किएका शाहको महŒवाकांक्षी प्रोजेक्ट ‘कमला मिस’ शुक्रबारबाट प्रदर्शनमा आउँदैछ । यो सिनेमा प्रख्यात नाटककार विजय मल्लको चर्चित कृति ‘कोही किन बरबाद होस्’बाट प्रेरित फिल्म हो । सोमबार प्रिमियर गरिएको ‘कमला मिस’ले दर्शकको साथ पाउने निर्माण पक्षको विश्वास छ । 
यस चलचित्रमा अभिनेता रमेश बुढाथोकी एउटा यस्तो ‘अर्थपूर्ण’ र ‘फरक’ चरित्रमा देखिँदैछन्, जसले उनको चार दशक लामो अभिनय यात्रामा नयाँ मानक स्थापित गर्ने अपेक्षा गरिएको छ । ‘कमला मिस’मा बुढाथोकी एउटा कलाकार मात्र होइनन्, मानवीय मनोविज्ञानको एउटा सूक्ष्म र जटिल संवाहक बनेर प्रस्तुत भएका छन् । बुढाथोकी कमला मिसमा आफ्नो भूमिकाबारे भन्छन्, ‘मैले धेरै चलचित्रमा काम गरेँ, तर ‘कमला मिस’ मेरो करियरका लागि एउटा विशेष र अर्थपूर्ण मोड हुनेछ ।’ उनको यो आत्मविश्वासले नै बताउँछ कि यसपटक दर्शकले उनलाई सधैं देखिने भूमिकाभन्दा विशिष्ट भूमिकामा पाउनेछन् । 
बालमनोविज्ञानलाई केन्द्रमा राखेर निर्माण गरिएको ‘कमला मिस’ले आमाको माया र स्नेहबाट वञ्चित बालमनको पीडा, आमाको खोजी, माया पाएपछि जीवनमा आउने परिवर्तन तथा एक महिलाले भोग्ने संघर्षलाई मार्मिक ढंगले प्रस्तुत गरिएको  छ । 
उसो त, शाह र बुढाथोकीको सहकार्यले आम दर्शकमा कौतुहलता बढाएको छ । यो सहकार्य किन पनि विशेष छ भने, नीर शाहले निर्देशन गरेको पछिल्लो फिल्म ‘सेतो बाघ’ पछि उनले लामो समय उत्कृष्ट कथाको खोजीमा बिताए । अर्कातिर, शाह आफैंले अभिनय गरेको पछिल्लो फिल्म ‘परान’ले बक्स अफिसमा १८ करोडको व्यापार गरेर उनको लोकप्रियता अझै कायमै रहेको प्रमाणित गरिसकेको छ ।
यस्तो व्यावसायिक उचाइमा रहेका निर्देशकले आफ्नो सपनाको प्रोजेक्ट ‘कमला मिस’का लागि बुढाथोकीलाई केन्द्रीय भूमिकामा रोज्नुले नै फिल्मको कन्टेन्ट कति ओजिलो होला भन्ने अनुमान लगाउन सकिन्छ ।
व्यावसायिकताको अन्धधुन्ध दौडमा हराउँदै गएको मौलिक कथावाचन र मनोवैज्ञानिक गहिराइलाई पुनर्जीवित गर्न बुढाथोकी यसपटक निर्देशक शाहका भरपर्दा सारथी बनेका छन् । बासना तिमिल्सिना, शिवम सराफ क्षेत्री, आरभ दाहाल र भावना मगर जस्ता कलाकारहरूको साथमा बुढाथोकीले यसपटक पर्दामा कस्तो जादु छर्ने हुन्, त्यो हेर्न बाँकी नै छ । तर, मौलिकता र बौद्धिक सिनेमाको खडेरी परेको यो समयमा रमेश बुढाथोकीको यो ‘फरक अवतार’ नेपाली फिल्म क्षेत्रका लागि एउटा शीतल झोक्का बन्न सक्छ । 
२०४० को दशकदेखि रंगमञ्चबाट यात्रा सुरु गरेका बुढाथोकीले सयौं टेलिफिल्म र दर्जनौं चलचित्रमा आफ्नो उत्कृष्ट अभिनयको छाप छोडिसकेका छन् ।
दशकौंदेखि रंगमञ्च र पर्दामा सक्रिय बुढाथोकीका लागि यो चलचित्र अर्को एउटा प्रोजेक्ट मात्र होइन । अनुभवको परिपक्वता पोख्ने क्यानभास पनि हो । उनले यसअघि निभाएका भूमिकाहरूभन्दा निकै भिन्न र चुनौतीपूर्ण चरित्र यसपटक दर्शकले देख्न पाउनेछन् ।
एउटा कुरा पक्का छ, ‘कमला मिस’ले एउटा कथा मात्रै भन्ने छैन, यसले रमेश बुढाथोकीको अभिनय क्षमताको त्यो ‘क्लासिक’ पाटो उजागर गर्नेछ, जुन नेपाली पर्दामा बिरलै देख्न पाइन्छ । कार्यकारी निर्माता उमेश मल्ल र चैतन्य प्रधान रहेका छन् भने लाइन प्रोड्युसर पुष्कर लामा (प्रेम भोम्जन) हुन् । छायांकन शिवराम श्रेष्ठ, संगीत युग भुसाल, कोरियोग्राफी रामजी लामिछाने, निर्माण व्यवस्थापन भोला सुबेदी तथा मुख्य सहायक निर्देशन सगर बोहराले सम्हालिरहेका छन् । पटकथा तथा संवाद नीर शाह, प्रजल दुलाल र सुगम दुलालले संयुक्त रूपमा तयार पारेका हुन् ।