‘ओल्ड इज गोल्ड’मा पुराना नेपाली चलचित्रप्रति उत्साह

चलचित्र विकास बोर्डले नेपाली चलचित्रको इतिहास संरक्षण गर्दै नयाँ पुस्तासम्म पु¥याउने उद्देश्यले सुरु गरेको ‘ओल्ड इज गोल्ड’ विशेष चलचित्र प्रदर्शन शृंखलामा दर्शकको उत्साहपूर्ण सहभागिता देखिएको छ ।
शृंखलाको शुभारम्भ नेपालको पहिलो नेपाली चलचित्र ‘आमा’का चार विशिष्ट कलाकार भुवन चन्द, चैत्यदेवी सिंह, वसुन्धरा भुसाल र विमला श्रेष्ठको उपस्थितिमा भएको थियो । कार्यक्रममा चारै कलाकारलाई माला लगाई स्वागत गरिएको थियो भने उहाँहरूले संयुक्त रूपमा दीप प्रज्वलन गरी कार्यक्रमको उद्घाटन गरेकी थिइन् ।
चलचित्र विकास बोर्डका अध्यक्ष दिनेश डिसीले सहजीकरण गरेको कार्यक्रममा चारै कलाकारले ‘आमा’ चलचित्र निर्माणताकाका अनुभव, तत्कालीन नेपाली चलचित्र क्षेत्रका स्मरण तथा ऐतिहासिक प्रसंगहरू दर्शकमाझ बताएका थिए । त्यसपछि उनीहरूकै उपस्थितिमा ‘आमा’ प्रदर्शन गरिएको थियो ।
कार्यक्रममा हलका सिट भरिएपछि कतिपय दर्शकले उभिएरै चलचित्र हेरेका थिए । पुराना नेपाली चलचित्रप्रतिको दर्शकको प्रेम र सम्मानलाई यसले थप उजागर गरेको बोर्डले जनाएको छ ।
कार्यक्रमका अवसरमा बोर्ड अध्यक्ष डिसीले हरेक महिना एउटा ऐतिहासिक नेपाली चलचित्र हलमा विशेष प्रदर्शन गर्ने घोषणा गरेका थिए । विशेष प्रदर्शनबाट संकलित रकम चलचित्रकर्मी कल्याणकारी कोषमा जम्मा गरिने बताइएको छ ।
शृंखलाको दोस्रो दिन आइतबार बिहान ११ बजे ‘सिन्दूर’ र दिउँसो २ बजे ‘परिवर्तन’ प्रदर्शन गरिएको थियो । दुवै शो हाउसफुल भएका थिए । ‘सिन्दूर’सँग जोडिएकी नेपाली चलचित्र क्षेत्रकी पहिलो व्यावसायिक हेयर ड्रेसर प्रतिभा (प्रभा) ढकालको विशेष उपस्थिति तथा ‘परिवर्तन’का प्रमुख कलाकार यज्ञराज घिमिरेको परिवारसहितको सहभागिताले कार्यक्रमलाई थप भावनात्मक र ऐतिहासिक बनाएको थियो ।
पुराना नेपाली चलचित्रलाई नयाँ पुस्तासम्म पु¥याउने, कलाकार तथा पर्दापछाडिका प्राविधिक व्यक्तित्वको योगदानलाई स्मरण गर्ने र नेपाली चलचित्र इतिहासको संरक्षण गर्ने उद्देश्यसहित ‘ओल्ड इज गोल्ड’ अभियानलाई निरन्तरता दिइनेछ ।
शृंखलाअन्तर्गत सोमबार बिहान ११ बजे ‘के घर के डेरा’ र दिउँसो २ बजे ‘मनको बाँध’ प्रदर्शन हुनेछ । ‘के घर के डेरा’को प्रदर्शनमा नायिका शर्मिला मल्ल तथा ‘मनको बाँध’को प्रदर्शनमा नायिका सुष्मा शाहीको विशेष उपस्थिति रहने बताइएको छ । दुवै चलचित्र चलचित्र विकास बोर्ड, काठमाडौंमा प्रदर्शन हुनेछन् ।