ग्यास आपूर्ति सहज बनाउने उद्योग संघको प्रतिबद्धता

काठमाडौं । एलपि ग्यास उद्योग संघ नेपालले भोटेकोशी नदीमा आएको विनाशकारी बाढीबाट प्रभावित क्षेत्रहरूमा खाना पकाउने ग्यासको आपूर्तिलाई निरन्तरता दिने प्रतिबद्धता जनाएको छ । संघले एक विज्ञप्ति जारी गर्दै बाढीका कारण उत्पन्न संकटको घडीमा अत्यावश्यक वस्तुको अभाव हुन नदिने बताएको हो ।
गत भदौ १० गते बुधबार रसुवाको भोटेकोशी नदीमा आएको भीषण बाढीले रसुवा, नुवाकोट, धादिङ, चितवन, गोरखालगायतका जिल्लाहरूमा ठूलो धनजनको क्षति पु¥याएकोमा संघले गहिरो दुःख व्यक्त गरेको छ । बाढीले नागरिकको ज्यान गएको, कयौँ बेपत्ता र घाइते भएको तथा घरबस्ती, सडक, पुल र जलविद्युत आयोजना जस्ता भौतिक संरचनामा गम्भीर क्षति पुगेको समाचारले संघ मर्माहत भएको विज्ञप्तिमा उल्लेख छ ।
संघका अध्यक्ष कृष्णभक्त श्रेष्ठद्वारा जारी विज्ञप्तिमा प्रभावित क्षेत्रमा एलपि ग्यास जस्तो अत्यावश्यक वस्तुको आपूर्ति र वितरणमा कुनै समस्या उत्पन्न हुन नदिन सम्बन्धित उद्योगी, व्यवसायी तथा विक्रेताहरूलाई विशेष आग्रह गरिएको छ । आपूर्ति व्यवस्थालाई प्रभावकारी बनाउन संघले आन्तरिक रूपमा समन्वय र सहकार्यका लागि समेत आह्वान गरेको छ ।
विपदको यस कठिन परिस्थितिमा सरकार, स्थानीय निकाय र सुरक्षा निकायले गरिरहेको उद्धार तथा राहत कार्यमा संघले ऐक्यबद्धता जनाएको छ । ‘प्रभावित नागरिकहरूको तत्काल उद्धार, राहत, उपचार तथा पुनःस्थापनाका लागि आवश्यक खाद्यान्न, औषधि र खानेपानीको सहज आपूर्ति सुनिश्चित गर्न सरकारका प्रयासहरूमा हातेमालो गर्न संघ सदैव प्रतिबद्ध छ,’ विज्ञप्तिमा भनिएको छ।