आठ जनाविरुद्ध ७३ लाखको भ्रष्टाचार मुद्दा

काठमाडौ । सडक योजनाको ठेक्का प्रक्रियामा भ्रष्टाचार गरेको आरोपमा डोल्पाको त्रिपुरासुन्दरी नगरपालिकाका तत्कालीन निमित्त प्रमुख प्रशासकीय अधिकृत लालप्रसाद पोखरेलसहित आठ जनाविरुद्ध भ्रष्टाचार मुद्दा दायर भएको छ । अख्तियार दुरुपयोग अनुसन्धान आयोगले मंगलबार विशेष अदालतमा ७३ लाख ६१ हजार ९५३ रुपैयाँ बिगो बराबरको मुद्दा दायर गरेको हो । 
आयोगका प्रवक्ता सुरेश न्यौपानेका अनुसार उनीहरुले आर्थिक वर्ष २०७८÷७९ मा त्रिपुरासुन्दरी नगरपालिका–६ हरियापानी पालंङ माझफाल हुँदै रुकुमसम्म सडक योजनाको ठेक्का प्रक्रियामा भ्रष्टाचार गरेको पाइएको हो । सार्वजनिक खरिद ऐन तथा नियमावलीविपरीत कम रकम कबोल गर्नेलाई छाडेर बढी कबोल गर्नेको बोलपत्र स्वीकृत गर्दै ठेक्का दिएको अनुसन्धानमा पाइएपछि मुद्दा दायर गरिएको आयोगले उल्लेख गरेको छ । 
आयोगले मुद्दामा उक्त नगरपालिकाका तत्कालीन इन्जिनियर कर्णबहादुर कार्की, प्रशासकीय अधिकृत हिराचन्द्र धराला, वरिष्ठ लेखा सहायक रुपचन्द्र बुढा, शिक्षा अधिकृत भीमबहादुर थापा, एमआइएस अपरेटर हरिचन्द्र विष्ट, बोलपत्र मूल्यांकन समिति सदस्य शिशिरकुमार गुरुङ, निर्माण कम्पनी छल निर्माण सेवा र त्यसका सञ्चालक दीपचन्द्र रोकायाविरुद्ध भ्रष्टाचार मुद्दा दायर भएको छ । 
भ्रष्टाचार निवारण ऐन, २०५९ बमोजिम उनीहरुविरुद्ध बिगो रकम ७३ लाख ६१ हजार ९५३ रुपियाँ कायम गरी सजाय हुन मागदाबी लिइ मङ्गलबार विशेष अदालत काठमाडौँमा आरोपपत्र दायर गरिएको आयोगले जनाएको छ ।