भूमि व्यवस्थापन प्रशिक्षण केन्द्र र महासंघको सहकार्यमा घरजग्गा तालिम सुरु

काठमाडौं । भूमि व्यवस्था, सहकारी, संघीय मामला तथा सामान्य प्रशासन मन्त्रालय मातहतको भूव्यवस्थापन तालिम केन्द्र (एलएमटिसी) र नेपाल जग्गा तथा आवास विकास महासंघको संयुक्त आयोजनामा घरजग्गा व्यवसायलाई मर्यादित, कानुनी र प्रविधिमैत्री बनाउने उद्देश्यले १५ दिन अवधि रहेको तालिम कार्यक्रम सुरु भएको छ ।
उदघाटन सत्रमा निमित्त तालिम प्रमुख रामकुमार सापकोटाले भू–सेवालाई नागरिक र व्यवसायमैत्री बनाउन मन्त्रालय र नेपाल जग्गा तथा आवास विकास महासंघसँग सम्झौता पत्र  तयार गरी कार्यविधि अनुसार तालिम सञ्चालन गरेको जानकारी दिए । ‘जग्गा प्रशासन, नाप नक्सा तथा व्यावसायिक अभिवृद्धि सम्बन्धी तालिम’ले सहभागीहरूको ज्ञान र सीपको दायरा फराकिलो बनाउने उनले बताए ।
कार्यक्रममा महासंघका पूर्वअध्यक्ष भेषराज लोहनीले परम्परागत रूपमा हातले नक्सा बनाउने अवस्थाबाट सुरु भएको घरजग्गा क्षेत्र अहिले डिजीपीएस जस्ता आधुनिक प्रविधिसम्म आइपुगेको उल्लेख गरे ।
महासंघका कानुनी सल्लाहकार डा. गोकुल प्रसाद बुर्लाकोटीले तालिमको कानुनी एवं प्रक्रियागत ढाँचाबारे स्पष्ट पार्दै १५ दिने आवासीय प्रशिक्षण सत्रबाट प्राप्त अनुभवले सहभागीहरूलाई दक्षता प्रदान गर्ने र सिक्ने–सिकाउने वातावरण बनाउने बताए ।
तालिम संयोजक तथा कार्यक्रम सञ्चालक महासंघका सचिव घनश्याम पोखरेलले प्रशिक्षार्थीहरूले दत्तचित्त भएर तालिम लिनुपर्नेमा जोड दिए । 
महासंघका अध्यक्ष विष्णुप्रसाद घिमिरेले सरकारले हाल  ६ वटा महानगरपालिका र ११ वटा उपमहानगरपालिकामा लागू गरेको भू–उपयोग नीतिको दायरा फराकिलो बनाएर अन्य नगरपालिका र गाउँपालिकाहरूमा पनि लागू गर्नुपर्ने माग गरे ।