एकातिर दसैं, अर्कातिर सिकाली

ललितपुरको खोकनास्थित सिकाली मन्दिर परिसरमा जारी सिकाली जात्राका अवसरमा शुक्रबार रुद्रायणी देवगणहरू परम्परागत मुकुट, कलेवर पोसाक, गरगहना लगाएर देवगणको भेषमा अश्वमेघ यज्ञमा नृत्यमार्फत सहभागी  हुँदै । दसैं नमनाउने खोकनावासीले घटस्थापनादेखि फूलपातीसम्म मनाउने सिकाली जात्रा यहाँको मौलिक संस्कृति र परम्पराको प्रतीक मानिन्छ । देशभर दसैंको टीका र जमराको तयारी चलिरहँदा ललितपुरको खोकनामा भने न जमराको चटारो छ, न टीकाको प्रतीक्षा। यहाँका रैथाने बासिन्दा यतिबेला दसैंको सट्टा आफ्नी आराध्यदेवी रुद्रायणीको पूजाआजा र सिकाली जात्रामा रमाइरहेका छन् । खोकनाले आफ्नै मौलिक परम्परामार्फत सांस्कृतिक पहिचान जोगाउँदै आएको छ । सिकाली जात्रा घटस्थापनादेखि नवमीसम्म मनाइन्छ । जात्राका क्रममा सिकाली मन्दिर परिसरमा विभिन्न धार्मिक विधि, पूजाआजा, बाजागाजा र परम्परागत मुकुन्डो नाच प्रस्तुत गरिन्छ । देवगणले विभिन्न देवीदेवताको रूप धारण गरी नृत्य तथा अभिनयमार्फत धार्मिक र पौराणिक कथाहरू प्रस्तुत गर्छन् । गुठी तथा स्थानीय समुदायको सक्रिय सहभागितामा सञ्चालन हुने यो जात्रा खोकनाको मौलिक सांस्कृतिक पहिचानसँग जोडिएको छ । तस्बिरः घनश्याम श्रेष्ठ/रासस