सर्वोच्चका प्रस्तावित चार न्यायाधीशविरुद्ध उजुरी आह्वान

काठमाडौं । सर्वोच्च अदालतका प्रस्तावित चार न्यायाधीशविरुद्ध आधार र प्रमाणसहित उजुरी दिन संसदीय सुनुवाइ समितिले आह्वान गरेको छ । संघीय संसद्, संसदीय सुनुवाइ समितिले आइतबार सूचना प्रकाशित गर्दै प्रस्तावित न्यायाधीशविरुद्ध उजुरी आह्वान गरेको हो । समितिले सूचना पहिलोपटक प्रकाशित भएको मितिले १० दिनभित्र कार्यालय समयमै उजुरी दिन सकिने जनाएको छ ।
न्यायाधीश नियुक्तिका लागि सिफारिस गरिएका डा. रत्नबहादुर बागचन्द, चन्द्रबहादुर सारु, जनक पाण्डे र गोकर्ण डाँगीविरुद्ध उजुरी दिन सकिने सूचनामा उल्लेख छ । गत  असोज २० गते  न्याय परिषद्को बैठकले उच्च अदालतका चार न्यायाधीशलाई सर्वोच्च अदालतको न्यायाधीशमा सिफारिस गरेको थियो । जसमा उच्च अदालत पोखराका मुख्य न्यायाधीश बागचन्द, उच्च अदालत, पाटनको हेटौंडा इजलासका न्यायाधीश पाण्डे,  उच्च अदालत पाटनका न्यायाधीश सारू र  यसअघि उच्च अदालत, जनकपुरको अस्थायी इजलास वीरगञ्जका न्यायाधीश डाँगीको नाम सिफारिस गरेको थियो । 
समितिका अनुसार उनीहरूलाई सर्वोच्च अदालतको न्यायाधीश पदमा नियुक्त गर्न उपयुक्त नभएको लागेमा स्पष्ट आधार र सबुत प्रमाणसहित शिष्ट तथा मर्यादित भाषामा उजुरी दिन सकिनेछ । उजुरी समितिको सचिवालय, सिंहदरबारस्थित कार्यालय वा सम्बन्धित जिल्ला प्रशासन कार्यालयमा दिन सकिने व्यवस्था गरिएको छ। उजुरीकर्ताले आफ्नो नाम, थर, वतन र फोन नम्बर स्पष्ट खुलाउनुपर्नेछ। चाहेमा आफ्नो नाम गोप्य राख्न अनुरोध गर्न सकिने पनि समितिले जनाएको छ ।
प्राप्त उजुरी सम्बन्धित जिल्ला प्रशासन कार्यालयले तोकिएको समयभित्र समितिको सचिवालयमा पठाउनुपर्ने सूचनामा उल्लेख छ । समितिले न्यायाधीश नियुक्तिको प्रक्रिया अघि बढाउनुअघि प्रस्तावित व्यक्तिहरूको योग्यता, आचरण तथा नियुक्तिको उपयुक्तताबारे सार्वजनिक रूपमा उजुरी आह्वान गरेको हो । प्रस्तावित न्यायाधीशहरु सर्वोच्च प्रवेशका लागि संसदीय सुनुवाई समितिले नाम अनुमोदन गर्नुपर्ने हुन्छ ।