इन्ड्राइभका चालकलाई रोयल इन्फिल्डदेखि ई–स्कुटरसम्म जित्ने अवसर

काठमाडौं । अनलाइनमार्फत यात्रु तथा सामान ढुवानी सेवा दिँदै आएका इन्ड्राइभका चालकले अब नियमित राइड पूरा गरेकै आधारमा आकर्षक पुरस्कार जित्ने अवसर पाउने भएका छन् । इन्ड्राइभ नेपालले चालकको मेहनत र योगदानको कदर गर्दै चार सातासम्म सञ्चालन हुने ‘प्लाटिनम ड्राइभर्स गिभअवे’ अभियान घोषणा गरेको छ । अभियानमा एक जनाले रोयल इन्फिल्ड क्लासिक ३५० मोटरसाइकल जित्नेछन् भने अन्य चालकले विद्युतीय स्कुटरदेखि स्मार्टफोन, इयरफोन र इन्धन भौचरसम्म प्राप्त गर्नेछन् ।
सन् २०२६ नोभेम्बर २ देखि २९ सम्म सञ्चालन हुने अभियानमा सहभागी हुन चालकले एक साताभित्र कम्तीमा ६० वटा राइड पूरा गरी ‘प्लाटिनम’ स्तर हासिल गर्नुपर्नेछ । अभियान अवधिमा पूरा गरिएका प्रत्येक राइडलाई स्वतः एउटा लक्की ड्र प्रविष्टिका रूपमा गणना गरिने कम्पनीले जनाएको छ । यसका लागि छुट्टै दर्ता गर्नुपर्ने छैन ।
काठमाडौंमा इन्ड्राइभ प्लेटफर्ममार्फत सेवा दिइरहेका सक्रिय चालक साझेदार अभियानमा सहभागी हुन सक्नेछन् । चालकले जति धेरै राइड पूरा गर्छन्, पुरस्कार जित्ने लक्की ड्रमा सहभागी हुने अवसर पनि त्यति नै बढ्नेछ ।
चार सातासम्म सञ्चालन हुने अभियानमा साप्ताहिक रूपमा विभिन्न पुरस्कार वितरण गरिनेछ । कम्पनीका अनुसार एक जनाले रोयल इन्फिल्ड क्लासिक ३५० मोटरसाइकल, चार जनाले याडिया विद्युतीय स्कुटर, १६ जनाले सामसङ ग्यालेक्सी ए१७ फाइभजी स्मार्टफोन र २० जनाले एयरफोन जित्नेछन् ।
त्यस्तै, २०० जनाले प्रतिव्यक्ति पाँच हजार रुपैयाँ बराबरको गिफ्ट भौचर र आठ हजार जनाले प्रतिव्यक्ति १० लिटर इन्धन बराबरको भौचर प्राप्त गर्नेछन् । साप्ताहिक पुरस्कारका विजेता चार साताभरि छनोट गरिनेछन् भने अभियान अवधिमा संकलित योग्य प्रविष्टिबाट अन्तिम लक्की ड्रमार्फत मोटरसाइकल विजेता चयन गरिनेछ ।
इन्ड्राइभ नेपालकी वरिष्ठ ड्राइभर अपरेसन्स विशेषज्ञ सुनिता जिमी राईले चालक साझेदारको निरन्तर मेहनत, समर्पण र योगदानको सम्मान गर्न अभियान ल्याइएको बताइन् । उनका अनुसार चालकलाई थप प्रोत्साहन दिनुका साथै चाडपर्वको समयलाई रमाइलो र स्मरणीय बनाउनु अभियानको उद्देश्य हो ।
कम्पनीले नेपालमा विस्तार भइरहेको आफ्नो मोबिलिटी सेवामा चालक साझेदारको भूमिका महत्वपूर्ण रहेको उल्लेख गर्दै उनीहरूको सक्रिय सहभागिता बढाउन र सम्बन्ध थप सुदृढ बनाउन अभियानले सहयोग गर्ने विश्वास व्यक्त गरेको छ ।