‘अभिमन्यु’को प्रदर्शन मिति सरेको सर्‍यै

सस्पेन्स थ्रिलर फिल्म ‘अभिमन्यु’को प्रदर्शन मिति फेरि सरेको छ । यसअघि साउन २३ मा प्रदर्शन मिति तोकिएको थियो तर रिलिजको तयारी नपुगेको भन्दै फिल्म सर्‍यो । त्यसपछि लगभग एक महिनाका लागि फिल्म सारिएको थियो र प्रदर्शन मिति भदौ २७ तोकियो । त्यो बेला भने जेनजी आन्दोलनका कारण फिल्म प्रदर्शन रोकियो र असोज २४ गते प्रदर्शन हुने भनिएको थियो ।

हाल यो फिल्म कात्तिक २१ गतेबाट हलमा लाग्ने बताइएको छ । हालैको वर्षाले देशभरको जनजीवन प्रभावित भएपछि फिल्मको प्रदर्शन मिति सारिएको निर्माण पक्षले जनाएको छ । कात्तिक २१ गते नै ‘जारी २’ र ‘मन बिनाको धन’ फिल्म पनि प्रदर्शन हुँदैछन् ।

कात्तिक २१ गतेबाट भने ‘अभिमन्यु’ नसर्ने निर्माता विनोद पौडेलले विज्ञप्ति जारी गर्दै बताएका छन् । उनले फेसुबकमा लेखेका छन्, ‘दर्शकको सहज पहुँच र सुरक्षित माहोलमा फिल्म प्रदर्शन गर्न सकियोस् भन्ने उद्देश्यले यो निर्णय लिएका हौं । प्रतिकूल परिस्थितिमा दर्शकको साथ र सहयोगको अपेक्षा राखेका छौं ।’

विनोदले यसअघि सर्वकालीक ब्लकबस्टर फिल्म ‘पूर्णबहादुरको सारङ्गी’का निर्माण गरेका थिए । नेपाली र हिन्दी दुवै भाषामा तयार पारिएको बनेको ‘अभिमन्यु’मा कामेश्वर चौरासिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, शिशिर वाङ्देल लगायतको अभिनय रहेको छ । 

सेभेन सिज सिनेमाको ब्यानरमा निर्माण भएको यो फिल्मका निर्देशक सुशान्त गौतम हुन् । फिल्मले प्रलोभनको चक्रव्यूहमा फस्ने र त्यहाँबाट उम्किन खोज्ने व्यक्तिको संघर्षको कथा भन्नेछ ।

मुकेश खनालको लेखन रहेको यो फिल्मका निर्माता विनोद पौडेल र गुञ्जन गिरी हुन् भने रमेश चौलागाईं र हरि श्रेष्ठ सह–निर्मातामा छन् । 

कार्यकारी निर्माताहरू विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ हुन् । यसमा शरद महतोको डिओपी, मनोज श्रेष्ठको भिएफएक्स, जुनिम गहतराजको रंग संयोजन तथा मदन घिमिरेको सम्पादन रहेको छ ।