जापानिज प्रेमिका भेट्न गएका म्याग्दीका छन्त्यालको छुरा प्रहार गरी हत्या

टोकियो । प्रेमिका भेट्न गएका म्याग्दी घर भई जापानको चिवामा बस्ने बादल छन्त्यालको छुरा प्रहारबाट हत्या भएको छ । चिवा प्रिफेक्चस्थित नरासिनो सिटीमा चक्कु प्रहारबाट छन्त्यालको मृत्यु भएको हो ।

पुरानो घर म्याग्दी भएपनि छन्यालको परिवार हाल कास्कीको पोखरामा बसोबास रहेको छ । परिवारका अनुसार करिब ३० वर्ष उमेरसमूहकी निज युवती र छन्त्यालबीच  गत एक वर्षदेखि प्रेमसम्बन्ध रहेको र प्रेममा खटपटपछि छुट्ने निर्णय गरेर अन्तिम भेटका लागि छन्त्याल होटल गएका थिए । 

त्यस होटलमा उनीहरू गत एक वर्षदेखि हरेक आइतबार जाने गरेको दावी गरिएको छ । आइतबार बिहान ३ बजेसम्म छन्त्याल आफ्ना साथीहरूसँग सम्पर्कमै रहेको बुझिएको छ । त्यसपछि उनका दाजु तेजेन छन्त्यालले आइतबार बेलुका साँझ ५ बजेको आसपासमा मृत अवस्थामा भेटिएको खबर पाएको बताएका छन् ।