चितवनमा ‘बोनम्यारो प्रत्यारोपण’ सेवा योजना  

चितवन । विपी कोइराला मेमोरियल क्यान्सर अस्पतालमा बोनम्यारो प्रत्यारोपण गर्ने तयारी गरेको छ ।  यसका लागि सात सदस्यीय चिनियाँ टोली बिहीबार भरतपुर आएको छ । अस्पतालमा बोनम्यारो प्रत्यारोपणका लागि चीन सरकारले भवन, आवश्यक उपकरण र जनशक्ति व्यवस्थापनमा  सहयोग गर्दै छ । 

नेपाल र चीन सरकारका बीचमा यस सम्बन्धी सम्झौता भइसकेको छ । अस्पतालका कार्यकारी निर्देशक डा. शिवजी पौडेलका अनुसार आएको विज्ञ टोलीले अस्पतालमा बोनम्यारो प्रत्यारोपण गर्नका लागि आवश्यक पर्ने अन्य सहायक विभागको अध्ययन गर्ने छ ।

सघन उपचार कक्ष, रेडिएसन अंकोेलोजी, प्रयोगशाला, मेडिकल अंकोलोजी लगायतका विभागको अहिलेको अवस्था र यसबाट बोनम्यारो प्रत्यारोपणमा हुनसक्ने सहयोगका बारेमा टोलीले अध्ययन गर्ने छ । कार्यकारी निर्देशक डा. पौडेलका अनुसार चीनबाट नियमित रूपमा यहाँ आउने चिकित्सक टोलीको यस अघिको १५औं टोलीका प्रमुख चाहु क्वीमिङको नेतृत्व सातजना विज्ञ चिकित्सक सहभागी छन् । चिनियाँ टोलीलाई अस्पतालमा स्वागत गर्दै सञ्चालक समितिका अध्यक्ष डा. विजय न्यौपानेले यथाशक्य छिटो काम थालेर बिरामीलाई सेवा दिने वातावरण बनाउन आग्रह गरे ।  

टोली नेता क्वीमिङ र क्यान्सर अस्पतालमा हाल रहेका १६औं चिनियाँ चिकित्सक टोलीका प्रमुख यान ल्याङले बोनम्यारो प्रत्यारोपणको पूर्व तयारीस्वरूप सम्बन्धित विभागमा रहेर पाँच दिन अध्ययन अवलोकन गरिने बताए ।

कार्यकारी निर्देशक डा. पौडेलका अनुसार हालको प्रशासनिक भवन नजिकै बोनम्यारो प्रत्यारोपणका लागि आधुनिक दुईतले भवन निर्माण गरिने छ । यस कामका लागि स्वास्थ्य तथा जनसंख्या मन्त्रालयबाट आवश्यक सबै प्रक्रिया पूरा गरी वातावरणीय प्रभाव मूल्यांकनका लागि वन तथा वातावरण मन्त्रालयमा फाइल पुगेर अन्तिम चरणको काम भइरहेको छ । उनले भने, ‘सम्भवतः अबको एक दुई सातामा यो काम सम्पन्न हुन्छ ।’

यसका लागि अस्पतालमा रहेका २९ वटा भवनको अभिलेखीकरण गरी नक्सा पास गरेको छ । भरतपुर महानगरपालिकालाई १ करोड ७८ लाख रुपैयाँ राजस्व बुझाएर नक्सा पास गरिएको हो । वातावरणीय प्रभाव मूल्यांकनको काम पूरा भएपछि चिनिया“ तर्फबाट निर्माणको काम थालिने छ । 

ढिलोमा तीन वर्षभित्रमा बोनम्यारो प्रत्यारोपणको काम सुरु हुने चिनियाँ टोलीले जानकारी दिएको पौडेलले बताए । सुरुमा चार शय्याको विभाग बन्ने छ । यसबाट एक वर्षमा ५० जना हाराहारीको बोनम्यारो प्रत्यारोपण गर्न सकिने मेडिकल अंकोलोजी विभागका प्रमुख डा. गुरुशरण साहले बताए ।

उनका अनुसार नेपालमा वार्षिक एक सयजना हाराहारीलाई बोनम्यारो प्रत्यारोपण गर्नुपर्नै हुन्छ । अहिले अधिकांश भारतका अस्पतालमा बिरामी जाने गर्दछन् । जसका लागि अस्पतालले एक जनाको भारु २० लाख हाराहारी लिने गर्दछन् । यो सेवा ययाँ सुरु भएसंगै उपचार खर्च पनि कम हुने उनले बताए ।

- रासस