८९ वर्षको उमेरमा धर्मेन्द्रको निधन

भारतीय सिनेमाका अत्यन्त लोकप्रिय कलाकार धर्मेन्द्रको सोमबार ८९ वर्षको उमेरमा निधन भएको छ । रोमान्टिक कमेडीदेखि उच्चस्तरीय एक्सन ब्लकबस्टरसम्म उत्तिकै कुशलताका साथ अभिनय गर्ने उनको क्षमताका कारण लामो समय फिल्म उद्योगमा टिकेका थिए ।

धर्मेन्द्रका बारेमा नेपालमा एउटा स्मृति यत्ति रह्यो कि उनका फिल्म काठमाडौंमा लामो समयसम्म प्रतिबन्धित रहे ।

‘मेरा गांव मेरा देश’को सुटिङका बेला नेपाली विद्यार्थीसँग फिल्मकर्मीको विवादपछि भएको कुटाकुटका कारण धर्मेन्द्र अभिनीत फिल्म नेपालमा प्रदर्शनमा रोक लागेको थियो । यो कुटाकुट भारतको राजस्थानमा भएको थियो तर नेपाली विद्यार्थी कुटिएको विरोधमा अखिल नेपाल भारतीय विद्यार्थी संगठनले समेत विज्ञप्ति जारी गरेपछि नेपालमा धर्मेन्द्र अभिनीत फिल्म अनौपचारिक रूपमा प्रतिबन्धित भएको फिल्मकर्मी प्रकाश सायमी बताउँछन् । जसरी अनौपचारिक रूपमा प्रतिबन्धित भयो, पछि उसैगरी खुला पनि भयो तर नेपालमा धर्मेन्द्रका फिल्म खुलेआम रिलिज हुने वातावरण बनिसक्दा उनको क्रेज घटिसकेको थियो ।

अभिनेता धर्मेन्द्रको स्वास्थ्य पछिल्ला महिनाहरूमा राम्रो थिएन र उपचारका लागि केही समयअघि उनलाई मुम्बईको एक अस्पतालमा भर्ना गरिएको थियो ।

धर्मेन्द्रले करिब छ दशक लामो चम्किलो करियरमा २५० भन्दा बढी चलचित्रमा अभिनय गरेका थिए । उनले संसद् सदस्यका रूपमा पनि सेवा गरे । भारतको उच्च नागरिक सम्मानमध्ये एक प्रतिष्ठित पुरस्कारबाट सम्मानित भए ।

सन् १९८० को दशकमा उनले एक्सनप्रधान चलचित्रहरूमा लामो समय बिताएका कारण ‘हि–म्यान’को उपनामसमेत पाएका थिए । धर्मेन्द्रको सबैभन्दा चर्चित र प्रिय भूमिकामध्ये सन् १९७५ को क्लासिक फिल्म ‘शोले’ मा उहाँले निभाएको ‘वीरु’ विशेष उल्लेखनीय मानिन्छ । वीरुको हाँसो, जोश र उदार मनका लागि उनी उत्तिकै लोकप्रिय रहे । छ सन्तानका पिता धर्मेन्द्रले पछि आफ्ना सन्तानलाई फिल्म उद्योगमा स्थापित गर्न फिल्मसमेत निर्माण गरे । सनी र बबी दुई छोराले आफ्नो समयमा देओल परिवारको अभिनय विरासतलाई जारी राखे । उनको अन्तिम अभिनय यात्रा भने निर्देशक श्रीराम राघवनको आगामी चलचित्र ‘इक्किस’ हुनेछ । भारत–पाकिस्तान युद्धमाथि बनेको सो फिल्मको प्रदर्शन अर्को महिना हुने बताइएको छ ।