‘हाइरार्की’ सिरीजको फिल्म घोषणा

साेनी पिक्चर्सले लोकप्रिय लेखक जेम्स इस्लिङ्टनको नयाँ फेन्टासी पुस्तक सिरिज ‘हाइरार्की’का फिल्म राइट किनेपछि प्रशंसकहरू उत्साहित छन् । उच्च फेन्टासीमा रुचि राख्ने पाठकमाझ छिटो लोकप्रिय बन्दै गएको यो सिरिजलाई अब ठूला पर्दामा रूपान्तरण गर्ने तयारी भएको हो । जेम्स इस्लिङ्टनका ‘द लिकोनियस ट्राइलोजी’ पछि आएको यो नयाँ सिरिजले पनि बजारमा निकै राम्रो प्रतिक्रिया पाइरहेको छ । सिरिजको पहिलो पुस्तक ‘द वील अफ द मेनी’ प्रकाशित भएको केही समयमै न्यूयोर्क टाइम्स बेस्टसेलर बनेको थियो । यसैबीच सोनीले यसका सम्पूर्ण फिल्म अधिकार सुरक्षित गर्दै यसको कथालाई फिल्ममा रूपान्तरण गर्ने घोषणा गरेको हो ।

सिरिजको कथा क्याटेनन रिपब्लिक भन्ने काल्पनिक संसारमा आधारित छ । यो संसारमा समाज ‘हाइरार्की’ नामक कठोर शक्ति संरचनाले बाँधिएको छ । यहाँ मानिसहरूले आफ्नो इच्छा, जीवनशक्ति वा मानसिक ऊर्जा माथिल्लो वर्गलाई बुझाउनुपर्छ । जसरी कोही समाजमा थोरै शक्तिशाली छ, उसले अरूको रहर अधिक मात्रामा आफ्नो पक्षमा तान्न सक्छ । यही प्रणालीले शक्तिशालीलाई अझ शक्तिशाली र कमजोरलाई अझ निर्भर बनाएको छ । कथाको केन्द्रमा भीस टेलिमस नामका युवालाई राखिएको छ । बाहिरबाट साधारण देखिने भीस वास्तवमा धेरै गुप्त उद्देश्य बोकेका पात्र हुन् । उनी प्रतिष्ठित क्याटेनन एकेडेमीमा भर्ना हुन्छन्, तर उनको वास्तविक लक्ष्य भने गहिरा रहस्यहरू उजागर गर्नु, एउटा गम्भीर हत्या प्रकरण बुझ्नु र राज्यभित्र लुकेका सत्ताका असली संरचना पत्ता लगाउनु हो । पुस्तकमा राजनीतिक षड्यन्त्र, विद्रोह, सामाजिक असमानता र व्यक्तिगत संघर्षलाई रोमाञ्चक शैलीमा प्रस्तुत गरिएको छ ।

सोनी पिक्चर्सका पिटर कङ र लुइस प्रोभोस्टले परियोजनालाई अघि बढाइने बताएका छन् । यद्यपि निर्देशक वा कलाकारको नाम तय भइसकेको छैन । पुस्तकको विश्वव्यापी लोकप्रियता हेर्दा यो फिल्म परियोजनाले धेरै दर्शक आकर्षित गर्न सक्ने अनुमान छ ।

जेम्स इस्लिङ्टनका पाठकहरूले अहिले नै सामाजिक सञ्जालमा फिल्मका बारेमा उत्साह व्यक्त गरिरहेका छन् । धेरैले ‘हाइरार्की’को विशाल संसार, राजनीतिक संघर्ष र अनौठो इच्छा प्रणालीलाई पर्दामा कसरी देखाइने हो भन्ने उत्सुकता व्यक्त गरेका छन् ।

सिरिजको दोस्रो पुस्तक ‘द स्ट्रेन्थ अफ द फ्यु’ शीघ्र प्रकाशन हुँदैछ, जसले कहानीलाई अझ विस्तार गर्ने अपेक्षा गरिएको छ । पुस्तकको सफलतासँगै फिल्म पनि उत्कृष्ट फेन्टासी फ्रेन्चाइज बन्न सक्ने सम्भावना देखिएको छ । मनोरञ्जन जगतका विश्लेषकहरूका अनुसार ‘हाइरार्की’ले ‘हंगर गेम्स’ र ‘ड्युन’जस्ता प्रस्तुतिहरूलाई मन पराउने दर्शकहरूलाई आकर्षित गर्नेछ । अब भने पाठक र फ्यानहरू सोनीबाट आउने आधिकारिक फिल्म योजनाको घोषणा पर्खिरहेका छन् ।