वर्षको संगीत स्पोटीफाइ र्‍याप्डमा

न्यूयोर्क – चालु वर्ष २०२५ को अन्त्य नजिकिँदै छ । यही बेलामा संगीत स्ट्रिमिङ प्लेटफर्म स्पोटीफाइले आफ्नो वार्षिक र्‍याप्ड रिपोर्ट सार्वजनिक गरेको छ । यसले प्रयोगकर्तालाई यो वर्ष सर्वाधिक सुनिएका गीत, कलाकार, पोडकास्ट र अन्य अडियो सामग्रीको जानकारी दिन्छ । यो रिपोर्ट हरेक वर्षको सबैभन्दा प्रतिक्षित सुविधा बनेको छ । स्पोटीफाइ र्‍याप्ड गत जनवरीदेखि करिब मध्य–नोभेम्बरसम्मको सुन्ने डेटा संकलन गरेर तयार गरिन्छ । यसैले नोभेम्बर र डिसेम्बरमा स्रोताले सुनेका गीतहरू रिपोर्टमा समावेश हुँदैनन् ।

गीत, कलाकार र एल्बमको सूची तयार गर्न, स्पोटीफाइले प्रयोगकर्ताको सुन्ने समय र पटक हेर्छ । गीतहरूका लागि कम्तीमा ३० ट्र्याक ३० सेकेन्डभन्दा बढी सुन्नुपर्छ । कलाकारको सूचीमा कम्तीमा ५ फरक कलाकार ३० सेकेन्डभन्दा बढी सुन्नु आवश्यक हुन्छ । नयाँ कुरा, २०२५ मा एल्बम र अडियोबुक पनि र्‍याप्डमा देखिने सुविधा थपिएको छ ।

रिपोर्ट तयार गर्न स्पोटीफाइले वर्षभर प्रविधि र मानवीय काम दुवै प्रयोग गर्छ । यस वर्षको रिपोर्ट प्रयोगकर्ताको प्रतिक्रियाअनुसार अझ रमाइलो र इन्टरएक्टिभ बनाइएको छ । उदाहरणका लागि, तपाईंले आफ्नो शीर्ष गीत अनुमान लगाउन सक्नुहुन्छ, स्रोताको उमेर थाहा पाउन सक्नुहुन्छ र र्‍याप्ड पार्टीमार्फत साथीहरूसँग तुलना पनि गर्न सक्नुहुन्छ । एआई पनि प्रयोग गरिएको छ । २०२५ मा ‘आर्काइभ’ नामक नयाँ सुविधा एआई प्रयोग गरेर विशिष्ट दिनहरूको सुन्ने डेटा विश्लेषण गर्छ । तर रिपोर्टको मुख्य आधार मानव सिर्जनशीलता नै हो ।

र्‍याप्डजस्ता रिपोर्टहरूले प्रयोगकर्तालाई आफ्नो डेटा देख्ने मौका दिन्छ । एप्पल म्युजिक, युट्युबजस्ता अन्य प्लेटफर्मले पनि वर्षको अन्त्यमा प्रयोगकर्ताका संगीत र गतिविधिको सारांश दिन थालेका छन् । यसले प्रयोगकर्तालाई मनोरञ्जनसहितको डेटा अनुभव गराउँछ । यसरी स्पोटीफाइ र्‍याप्डले प्रयोगकर्ताको डिजिटल गतिविधि मनोरञ्जनमा परिणत गर्छ र हरेक वर्षको प्रतिक्षित अनुभवका रूपमा स्थापित भएको छ ।