सापटी काकाको सत्कर्म

टेलिभिजनको पर्दामा सापटी काका उपनामबाट प्रख्यात दिवाकर भण्डारीले आफ्नो कलाकारिताको दुई दशक पूरा भएको अवसरमा हालै छ जना विभिन्न विद्यालयमा अध्ययनरत विद्यार्थीहरूलाई सहयोग गरे । विद्यार्थीलाई सहयोग गर्ने त एउटा बहाना मात्र हो । उनले आफ्नो विद्यार्थी जीवनमा भोगेको संघर्ष र दुःख अरूले पनि भोगिरहेका छन्, उनीहरूलाई थोरै मात्र सहयोग गर्न पाउँदा आनन्द लाग्ने हुनाले उनले यो सहयोग गरेका हुन् ।

अन्नपूर्ण गाउँपालिका २ मा जन्मिएका दिवाकरले ‘मेरी बास्सै’बाट चर्चामा आएका हुन् । उनले त्यसमा सापटी काकाको भूमिकाले उनलाई निकै ख्याति दिलायो । पछि उनले त्यही शृंखलालाई लेखन तथा निर्देशन गरेर अघि बढाए ।

२०५४ सालबाट नाटकबाट उनले कलाकारिता शुरु गरेका थिए । उनले हालसम्म सयभन्दा बढी नाटकको लेखन तथा निर्देशन रेका छन् । उनले दर्जनौं म्युजिक भिडियोको निर्देशन तथा अभिनयसमेत गरेका छन् ।

२०६६ सालमा ‘मेरी गंगा’ चलचित्र निर्माण तथा निर्देशन गरेर फिल्म उद्योगमा समेत आफ्नो पाइला अघि बढाएका उनलाई यस फिल्मले व्यवसायिक सफलता भने दिलाउन सकेन । तर अभिनयको चस्काका कारण उनले कयौं फिल्महरूमा अभिनय भने जारी राखे । उनले चिनो, कन्या दान, राज, इन्द्रेणी, किड्न्याप, नाईं नभन्नु ल लगायत थुप्रै चलचित्रहरूमा अभिनय गरेका छन् ।

२०६३ सालदेखि अपिल त्रिपाठीको टेलिफिल्म ‘खिचडी’बाट टेलिशृंखलाहरूमा पनि उनी देखापरे । उनले ‘एके ४७’, ‘लभ अफ माफ’, ‘पप्पु,’ ‘इतिहास सर,’ आदि टेलिफिल्मको निर्देशनसमेत गरे ।

यिनै सापटी काका फुर्सदमा सामाजिक काममा सक्रिय रुपमा भाग लिने गरेका छन् । उनी विभिन्न क्लब सदस्य तथा संघसंस्थाका अभियन्ता पनि हुन् । उनले हाल अनाथ तथा जेहेनदार विद्यार्थीको अभिभावकत्व ग्रहण गरेका छन् ।

नेपाल टेलिभिजनबाट ३८औं वार्षिकोत्सवको अवसरमा उत्कृष्ट निर्देशकको अवार्ड प्राप्त गरेका उनी आफ्नो जीवनभर कलाकारितामै रहन पाए हुन्थ्यो भन्ने कामना गर्छन् ।