मनोरञ्जन

टिकटक सर्चमा नेपालीको बदलिँदो रुचि

न्यूज २४ दैनिक

बुधबार, पुस १६, २०८२ १३:०७

सन् २०२५ भरि नेपालबाट सबैभन्दा धेरै केके खोजी भयो भन्ने सूची टिकटकले सार्वजनिक गरेको छ । मंगलबार सार्वजनिक सूचीले नेपाली प्रयोगकर्ताहरू वर्षभरि के–कस्ता विषयमा बढी जिज्ञासु रहे, उनीहरूको रुचि, चासो र दैनिक जीवनसँग जोडिएका खोज प्रवृत्तिहरू कस्ता रहे भन्ने स्पष्ट झलक देखाएको छ ।

सूचीअनुसार २०२५ मा टिकटक सर्च नेपाली प्रयोगकर्ताका लागि मनोरञ्जनमा मात्र सीमित नरही व्यवहारिक जानकारी खोज्ने महत्वपूर्ण माध्यमका रूपमा विकसित भएको देखिन्छ । दसैंतिहार र तीजजस्ता चाडपर्वका सामग्री, खाना पकाउने रेसिपी, घुमफिरका गन्तव्य, म्युजिक ट्रेन्ड, टेलिभिजन कार्यक्रमदेखि दैनिक निर्णयमा सहयोग पुर्‍याउने उपयोगी जानकारीसम्म टिकटकमा खोजिएको छ । छिटो जानकारी पाउन, समाचार अपडेट लिन, स्थानीय शैली र संस्कृतिबाट प्रेरणा लिन तथा नेपाली सन्दर्भ बुझ्ने क्रिएटरका सिफारिस प्राप्त गर्न प्रयोगकर्ताहरू टिकटक सर्चमा निर्भर देखिएका छन् ।

टिकटक दक्षिण एसियाका कन्टेन्ट अपरेसन्स लिड उमैस नवीदका अनुसार प्रयोगकर्ताहरूले भिडियो हेर्न मात्र नभई वास्तविक समयमा जानकारी, सिफारिस र सन्दर्भ खोजिरहेका छन् । खेलकुद गतिविधि पछ्याउन, सप्ताहान्तका घुमाघामको योजना बनाउन, नयाँ सीप सिक्न वा किनमेलअघि रिभ्यु हेर्न नेपालीले टिकटकलाई आधार बनाइरहेको देखिएको छ ।

यस वर्षका सर्च ट्रेन्डहरूले उद्देश्यपूर्ण खोजको प्रवृत्ति बढ्दै गएको संकेत गरेका छन् । मुस्ताङ, मनाङ, नर्थ अन्नपूर्ण बेस क्याम्प जस्ता गन्तव्यप्रति देखिएको चासोले टिकटकले यात्रा योजना र नयाँ अनुभव खोज्न महत्वपूर्ण भूमिका खेलिरहेको देखाउँछ । सेलिब्रिटी, चलचित्र, ड्रामा, गीत–संगीत र भाइरल क्षणहरूसँगै सार्वजनिक घटना, प्रविधि र समसामयिक समाचारमा अपडेट रहन पनि प्रयोगकर्ताहरू टिकटकमा सक्रिय देखिन्छन् । २०२५ मा सबैभन्दा धेरै खोजिएका शोबिज सेलिब्रिटीमा प्रियंका कार्की, राजेश हमाल र स्वस्तिमा खड्का छन् । टिकटक क्रिएटरतर्फ सिम्पल खरेल र आश्मा विश्वकर्मा चर्चित रहे भने खेलाडीमा साम्बा, विमल घर्ती मगर, लियोनल मेस्सी र किलियन एम्बाप्पे बढी खोजिएका छन् । गीत, खाना र ट्रेन्डिङ क्षणका खोजीमा पनि नेपाली सक्रिय देखिएका छन् ।