बिर्सिएका ६ शहीदमाथिको पुस्तक विमोचित

काठमाडौंमा ‘नेपालको प्रजातान्त्रिक आन्दोलनका वीर योद्धाहरू भाग २’ पुस्तक विमोचन गरियो । बिपी विचार राष्ट्रिय समाजले ४९ औँ राष्ट्रिय एकता तथा मेलमिलाप दिवसका अवसरमा बुधबार आयोजित विमोचन समारोहमा नेपाली कांग्रेसका पूर्व महामन्त्री कुलबहादुर गुरुङले अहिलेको राजनीतिमा मेलमिलापक उत्तिकै आवश्यक रहेकामा जोड दिए । उनले बिपीको मेलमिलापको नीतिका आधारमा मात्र अहिलेको राजनीतिक समस्या समाधान हुने बताए ।

बिपीले ४९ वर्षअघि राष्ट्र र राष्ट्रियताकै लागि मेलमिलापको नीति लिई आठ आठ वटा मृत्युदण्ड हुन सक्ने मुद्दाको पनि परवाह नगरी स्वदेश फर्किएको उनले स्मरण गरे । अहिलेका सबै राजनीतिक शक्ति पनि राष्ट्र र राष्ट्रियताकै मुद्दामा एकजुट भए वर्तमान समस्याको सहजै समाधान हुने कांग्रेस नेता गुरुङको भनाइ थियो ।

समाजका अध्यक्ष एवं कांग्रेसका पूर्व केन्द्रीय सदस्य विनयध्वज चन्दले २०४६ सालदेखि नै बिपी विचारबाट कांग्रेस स्खलित हुँदै जाँदा देशमा अहिले समस्या आएको विचार राखे । ‘सत्ताको राजनीति गर्न थालेपछि कांग्रेस निरर्थक हुन्छ भनी बिपीले भन्नुभएको विचारलाई अहिलेका कांग्रेसका पदाधिकारीले नबुझ्दा समस्या आएको छ,’ उनले भने ।

पूर्व मन्त्री गोविन्दराज जोशीले बिपीको विचार छोडी गिरिजाप्रसाद कोइराला अघि बढेकै कारण देशमा अहिलेको समस्या आएको बताए । गलत बाटो छोडेर कांग्रेस एक्लै हिँडेमा मात्र समस्या समाधानतिर जाने उनको भनाइ थियो ।

कांग्रेस नेता लोकेश ढकालले १२ बुँदे समझदारीपछि कांग्रेस सत्ता राजनीतितिर केन्द्रित तर सिद्धान्तबाट विमुख हुँदा देशमा समस्या आएको बताए । पुस्तकमा छ जना शहीदका विषयमा यो पुस्तकमा उल्लेख गरिएको पनि उनले सुनाए ।

पुस्तकका सम्पादक डा. वासुदेव खनालले प्रजातान्त्रिक आन्दोलनमा योगदान गरेका छ जना योद्धाका बारेमा पुस्तकमा विभिन्न लेखकका लेख समावेश गरिएको जानकारी दिए । समाजको सातौँ प्रकाशनका रुपमा प्रकाशित पुस्तकमा २४७ पृष्ठ छ । पुस्तकको मूल्य रु. ७५० राखिएको छ ।