मिस युनिभर्सका सञ्चालकलाई फौजदारी अभियोग

विश्वकै प्रतिष्ठित सौन्दर्य प्रतियोगिता मिस युनिभर्स यतिखेर ७३ वर्ष लामो इतिहासमै सबैभन्दा गम्भीर अस्तित्वको संकटमा परेको छ । प्रतियोगिता सञ्चालन गर्ने मुख्य संस्थाका दुई जना मुख्य सञ्चालक फौजदारी अभियोग र गम्भीर आर्थिक अपराधमा मुछिएपछि यो प्रतिष्ठित ब्रान्डको भविष्यमाथि कालो बादल मडारिएको हो । प्रतियोगिताकी सह–सञ्चालक तथा थाइल्याण्डको मिडिया कम्पनी जेकेएन ग्लोबल ग्रुपकी संस्थापक जक्काफोङ ‘एनी’ जक्रजुतातिपलाई थाइल्याण्डको अदालतले जेल सजाय सुनाएपछि यो प्रकरणले थप गम्भीर मोड लिएको हो ।

ब्यांककस्थित साउथ क्वाङ जिल्ला अदालतले एनीलाई आर्थिक ठगीको अभियोगमा दोषी ठहर गर्दै दुई वर्षको जेल सजाय सुनाएको छ । अदालतले उनलाई पेरोल अर्थात् सशर्त रिहाइ नपाउने गरी कडा फैसला गरेको हो । यो मुद्दा करिब १० लाख अमेरिकी डलर (तीन करोड थाई भाट) बराबरको कर्पोरेट बन्डमा गरिएको लगानीसँग सम्बन्धित छ । अदालतका अनुसार सन् २०२३ को जुलाई र अगष्टको बीचमा जेकेएन ग्लोबल ग्रुपले लगानीकर्ताहरूलाई कम्पनीको नाजुक आर्थिक अवस्था लुकाएर बण्ड बिक्री गरेको थियो । कम्पनी टाट पल्टिने अवस्थामा पुगिसकेको तथ्य लुकाएर वादीलाई भ्रममा पारी लगानी गर्न प्रेरित गरेको अदालतको ठहर छ । फैसला सुनाउने क्रममा एनी अदालतमा उपस्थित नभएकीले उनलाई ‘फरार अभियुक्त’ घोषणा गरिएको छ भने गिरफ्तारी वारेन्ट जारी गरिएको छ । कानूनी कारबाहीबाट बच्न उनी मेक्सिको वा युरोपतिर लुकेर बसेको अनुमान गरिएको छ ।

मिस युनिभर्सको संकट थाइल्याण्डमा मात्र सीमित नरही मेक्सिकोतर्फ पनि फैलिएको छ । सन् २०२४ देखि मिस युनिभर्सको ५० प्रतिशत स्वामित्व खरिद गरेका मेक्सिकन अर्बपति तथा लिगेसी होल्डिङ ग्रुपका मालिक राउल रोचा कान्तु पनि गम्भीर कानूनी झमेलामा छन् । मेक्सिकोका स्थानीय अधिकारीहरूले रोचालाई सङ्गठित अपराध, अवैध हतियार तस्करी र इन्धन चोरी जस्तो गम्भीर मुद्दामा अनुसन्धान गरिरहेका छन् । उनीविरुद्ध पनि मेक्सिकोमा पक्राउ पुर्जी जारी भइसकेको छ । फरार सूचीमा रहेकै बेला उनी हालै पेरिसको विलासी ‘रिट्ज होटल’ मा देखा परेको तस्बिर सार्वजनिक भएको थियो ।

शीर्ष नेतृत्वको कानूनी झमेलासँगै प्रतियोगिताको विश्वसनीयतामा पनि गम्भीर प्रश्न उठेको छ । हालै सम्पन्न मिस युनिभर्स प्रतियोगितामा नतिजा ‘सेटिङ’ गरिएको आरोपले विश्वभरका फ्यानहरूलाई आक्रोशित बनाएको छ । विशेष गरी मेक्सिकोकी प्रतियोगीको नतिजालाई लिएर उठेका प्रश्नहरूले सामाजिक सञ्जाल तातेको छ । धेरैले यसलाई आयोजक राष्ट्र र मालिकहरूको स्वार्थसँग जोडेर हेरेका छन् । दुई वर्षअघि मात्र जेकेएन ग्लोबलले दुई करोड डलरमा यो ब्राण्ड खरिद गर्दा ठूलो उत्साह देखिएको थियो । अहिले भने कम्पनी टाट पल्टिने प्रक्रियामा जानु र दुवै मालिकहरू फरार हुनुले ब्रान्डको गरिमा धुलिसात भएको छ । विश्लेषकहरूका अनुसार यो प्रकरणले मिस युनिभर्सको प्रायोजन, प्रसारण अधिकार र फ्रेन्चाइजीहरूमा प्रत्यक्ष असर पार्नेछ । धेरैको बुझाइमा जबसम्म वर्तमान मालिकहरू प्रतियोगिताबाट पूर्ण रूपमा अलग हुँदैनन्, तबसम्म गुमेको विश्वास पुनःस्थापित गर्न र ब्रान्डलाई पुनर्जीवन दिन असम्भवप्रायः हुनेछ ।