डा. मिश्रको ‘हिम्मत’ बजारमा

१७ वर्ष विदेश बसेपछि नेपालमै केही गर्नुपर्छ भन्ने निष्कर्षका साथ फर्किएकी मञ्जु मिश्रले नेपालमा पत्रकारितामा योगदान दिने उद्देश्यले कलेज अफ जर्नालिजम एन्ड मास कम्युनिकेशन (सीजेएमसी) स्थापना गरिन् । यसको स्थापनापछि नै त्रिभुवन विश्वविद्यालय पनि जुर्मुरायो । उता काठमाडौं विश्वविद्यालयले पनि यसलाई महत्व दिएर पठनपाठन गराउन थाल्यो । यसरी सीजेएमसीको स्थापनापछि नेपालमा पत्रकारिता शिक्षाको नवजागरणका क्षेत्रमा भएका कार्यबारे डा. मिश्रले स्मरण लेखेकी छन् ।

‘हिम्मत’ शीर्षकको यो पुस्तकमा उनले पत्रकारिता शिक्षामा आफूले चालेका कीर्तिमानी पाइलाका बारेमा खुलेर लेखेकी छन् । 

पुस्तकमा उनले आफ्नो एकल जीवनले आफूले भोगेको र गरेको संघर्षको सफलताले आम नेपाली र खासगरी महिलालाई प्रेरणा दिने उनको विश्वास छ । पुस्तकलाई उनले इमान्दार दस्तावेज मानेकी छन् । कटु अनुभवलाई पनि उनले ज्यूँका त्यूँ राखेकी छन् । आफ्नो भोगाइ अभिलेखीकरण गर्ने र त्यसको मूल्यांकनका लागि इतिहासलाई जिम्मा लगाउनु यो पुस्तकको उद्देश्य रहेको उनले बताएकी छन् ।

पुस्तकलाई कलेज अफ जर्नालिजम एन्ड मास कम्युनिकेशनले प्रकाशन गरेको छ । पुस्तकको मूल्य १२ सय रुपैयाँ रहेको छ ।