गोल्डेन ग्लोब्समा डिकाप्रियो अवार्ड शून्य रहे

विश्व चलचित्र उद्योगको प्रतिष्ठित पुरस्कार गोल्डेन ग्लोब्सको ८३औं संस्करणमा अमेरिकी अभिनेता टिमोथी शालामेले सर्वश्रेष्ठ अभिनेता (संगीत/कमेडी) पुरस्कार जित्दै लियोनार्डो डिकाप्रियो र जर्ज क्लुनीजस्ता दिग्गजलाई पछि पारेका छन् । उनले मार्टी सुप्रिम नामक टेबल टेनिस कमेडीमा अभिनय गरेका थिए ।  

यस वर्षको समारोहमा आइरिश अभिनेत्री जेसी बक्लीले ह्यामनेटबाट सर्वश्रेष्ठ ड्रामा अभिनेत्री जितिन् । उक्त फिल्मले सर्वश्रेष्ठ ड्रामा फिल्म पनि जित्दा निर्देशक क्लो झाओ र निर्माता स्टिभन स्पिलबर्गले दर्शकलाई चकित पारे ।  

वन ब्याटल आफ्टर अनोदर नामक फिल्मले सर्वाधिक चार पुरस्कार जित्यो, जसमा सर्वश्रेष्ठ संगीत/कमेडी फिल्म, निर्देशक र पटकथा समावेश छन् । तर डिकाप्रियोले भने कुनै पुरस्कार हात पार्न सकेनन्  ।

अन्य प्रमुख विजेताहरूमा टेयाना टेलरले वन ब्याटल आफ्टर एनोदर फिल्मबाट सहायक अभिनेत्रीको अवार्ड जितिन्  । त्यस्तै सेन्टिमेन्टल भ्यालु फिल्मबाट स्टेलन स्कार्सगार्डले सहायक अभिनेताको अवार्ड हात पारे  ।

रोज बर्नले इफ आइ ह्याड लेग्स आइ वुड किक यु फिल्मबाट सर्वश्रेष्ठ अभिनेत्री (संगीत/कमेडी फिल्म)को खिताब जितिन्  । यस्तै वाग्नर मोउराले द सेक्रेट एजेन्ट फिल्मबाट सर्वश्रेष्ठ अभिनेता (ड्रामा फिल्म) पुरस्कार जिते  ।

यसैगरी सर्वश्रेष्ठ एनिमेटेड फिल्म र गीत डेमन हन्टर्स (कोरिया)ले जित्यो भने, सर्वश्रेष्ठ अन्तर्राष्ट्रिय फिल्म द सेक्रेट एजेन्ट (ब्राजिल) बन्यो  ।

उता टेलिभिजनतर्फ ब्रिटिश किशोर अभिनेता ओवेन कुपरले एडोलसेन्सबाट सर्वश्रेष्ठ टीभी सहायक अभिनेता जिते । उनले आफ्नो भाषणमा ‘म अझै शिक्षार्थी हुँ’ भन्दै विनम्रता देखाए ।  

कमेडी श्रेणीमा सेथ रोगनले द स्टुडियोबाट पुरस्कार हात पारे । अन्य विजेतामा जीन स्मार्ट (ह्याक्स), नोआ वाइल (द पिट) र मिशेल विलियम्स (डाइङ फर सेक्स) परे ।  

गोल्डेन ग्लोब्सले यसपटक पहिलो पटक पोडकास्टलाई मान्यता दिँदै एमी पोहलरलाई गुड ह्याङ विद एमी पोहलरका लागि सर्वश्रेष्ठ पोडकास्ट पुरस्कार प्रदान गर्‍यो ।  

समारोहमा शालामेले आफ्नो आमाबाबु र प्रेमिका काइली जेनरलाई धन्यवाद दिँदै भावुक भाषण गरे ।  जेसी बक्लीले विविध टोलीलाई सम्मान गर्दै ‘यो साँचो सम्मान हो’ भनिन् । टेयाना टेलरले विविध लैंगिकताका बालिकाहरूलाई सम्बोधन गर्दै ‘हाम्रो प्रकाशलाई चम्कन अनुमति चाहिँदैन’ भनिन् । स्कार्सगार्डले ‘सिनेमालाई सिनेमाघरमै हेर्नुपर्छ’ भन्ने आग्रह गरे । रोज बर्नले हास्यपूर्ण शैलीमा परिवारलाई धन्यवाद दिँदा हल हल्का माहोलमा रमायो । यसरी, गोल्डेन ग्लोब्स २०२६ ले नयाँ प्रतिभा र विविधतालाई सम्मान गर्दै ओस्कारको दौडमा महत्वपूर्ण संकेत दिएको छ ।