नयाँ जेम्स बोन्डको खोजी

विश्वकै सर्वाधिक चर्चित र सफल गुप्तचर फिल्म शृंखला ‘जेम्स बोन्ड’ (००७) यतिबेला आफ्नो नयाँ नायकको खोजीका कारण हलिउडमा बहसको केन्द्रमा छ । सन् २०२१ मा ‘नो टाइम टु डाई’ मार्फत डेनियल क्रेगले यस प्रतिष्ठित भूमिकाबाट बिदा लिएपछि नयाँ बोन्ड को होला भन्ने कौतुहलता दर्शकमाझ संसारभर नै छ ।

हालैका खबरहरूका अनुसार ३४ वर्षीय बेलायती अभिनेता आरोन टेलर– जोन्सनको नाम यस भूमिकाका लागि चर्चामा छ । ‘किक–आस’ र ‘बुलेट ट्रेन’ जस्ता फिल्मबाट चिनिएका आरोनलाई निर्माण पक्षले औपचारिक प्रस्ताव पठाएको चर्चा चले पनि मुख्य निर्माता बारबरा ब्रोकोलीले अझै आधिकारिक घोषणा गरेकी छैनन् । उनले नयाँ बोन्ड ३० वर्षको आसपासको, बेलायती र कम्तीमा १०–१२ वर्षसम्म यो भूमिकालाई न्याय गर्न सक्ने व्यक्ति हुनुपर्ने अडान राख्दै आएकी छन् ।

जेम्स बोन्डको फिल्म इतिहास सन् १९६२ मा ‘डा. नो’ बाट सुरु भएको थियो, जसमा इयान फ्लेमिङको उपन्यासका यी चर्चित पात्रलाई सिन कोनरीले पहिलो पटक पर्दामा जीवन्त पारेका थिए । कोनरीपछि जर्ज लाजेनबी (केवल एक फिल्म ‘अन हर मेजेस्टिज सेक्रेट सर्भिस’ का लागि), रोजर मूर, तिमोथी डाल्टन, पियर्स ब्रुसनन र पछिल्लो समय डेनियल क्रेगले बोन्डको विरासतलाई पर्दामा अगाडि बढाए । सन् २००६ को ‘क्यासिनो रोयल’ देखि २०२१ को ‘नो टाइम टु डाइ’सम्म क्रेग ५ वटा फिल्ममा जेम्स बोन्ड बनेका छन् । त्यसअघि पियर्स ब्रुसनन १९९५ देखि २००२ सम्म ४, तिमोथी १९८७ र १९८९ का फिल्ममा देखिए । १९७३ देखि १९८५ सम्म ७ वटा फिल्म खेलेर लामो समय यो पात्रको विरासत धान्ने काम रोजर मूरले गरेका थिए ।

हालसम्म यो शृंखलाका २५ वटा आधिकारिक फिल्म निर्माण भइसकेका छन् । बक्स अफिसको कुरा गर्दा, यो शृंखला हलिउड इतिहासकै सर्वाधिक कमाउने फ्रेञ्चाइजमध्ये एक हो । सन् २०१२ मा रिलिज भएको ‘स्काइफल’ ले विश्वभर १.१ अर्ब डलरभन्दा बढीको व्यापार गरेर नयाँ कीर्तिमान कायम गरेको थियो । समग्रमा बोन्ड सिरिजले हालसम्म करिब ८ अर्ब डलरभन्दा बढीको व्यापार गरिसकेको छ ।

बोन्ड शृंखलासँग जोडिएका किस्साहरू पनि उत्तिकै रोचक छन् । जेम्स बोन्ड एक काल्पनिक ब्रिटिश गुप्तचर पात्र हुन्, जसलाई लेखक इयान फ्लेमिङले १९५३ मा पहिलो पटक आफ्ना उपन्यास ‘क्यासिनो रोयल’ मा परिचित गराएका थिए । पात्रको कोडनेम ‘००७’ हो, जहाँ दुई शून्यले ‘लाइसेन्स टु किल’ जनाउँछ । बोन्डको शरीरको चरित्र ’शानदार, स्टाइलिश, र रोमाञ्चक गुप्तचर’ रूपमा चित्रण गरिएको छ ।

सुरुवाती दिनमा लेखक फ्लेमिङले सिन कोनरीलाई बोन्डको भूमिकाका लागि ‘धेरै खस्रो र नमिलेको’ भन्दै अस्वीकार गरेका थिए । तर, पर्दामा जादुमय प्रस्तुति देखेपछि उनी कोनरीका फ्यान नै बने । अर्को रमाइलो तथ्य यो छ कि, जेम्स बोन्डको नाम वास्तवमा एक चराविद्को नामबाट लिइएको थियो । लेखक फ्लेमिङ आफ्नो पात्रका लागि एकदमै साधारण र निरस नाम खोजिरहेका थिए, त्यही बेला एउटा पुस्तकमा ‘जेम्स बोन्ड’ देखेपछि त्यसलाई नै फाइनल गरेका थिए । साथै, बोन्डले प्रयोग गर्ने कार ‘एस्टन मार्टिन’ र उनको ‘भोड्का मार्टिनी—सेकन, नट स्टर्ड’ भन्ने संवाद आज विश्वव्यापी पप संस्कृतिको अभिन्न अंग बनेको छ । नयाँ बोन्डको घोषणासँगै यो ६ दशक लामो गौरवपूर्ण विरासतले कुन नयाँ मोड लिने हो, त्यो हेर्न सम्पूर्ण सिनेमा जगत आतुर छ ।

नयाँ जेम्स बोन्डको दौडमा आरोन टेलर–जोन्सन बाहेक अन्य केही प्रभावशाली हलिउड स्टारहरूको नाम पनि निकै चर्चामा छ । ‘सुपरम्यान’ को भूमिकाबाट चर्चित हेनरी क्याभिल फ्यानहरूको पहिलो रोजाइमा छन् । उनको ’क्लासिक’ लुक र अनुभवले गर्दा उनी बलियो दाबेदार हुन्, तर उनको बढ्दो उमेर (४२ वर्ष) बाधक बन्न सक्ने अनुमान गरिएको छ ।

टम हार्डीको ’रफ एण्ड टफ’ छवि बोन्डका लागि सुहाउने केहीको ठम्याइ छ । यद्यपि, निर्माताहरूले अलि युवा अनुहार खोजिरहेकाले उनको सम्भावना केही कम देखिएको छ ।

बेलायती टिभी सिरिज ’ह्याप्पी भ्याली’ बाट चर्चित जेम्स नर्टनको नाम पनि अग्रपंक्तिमा छ । उनको शान्त र परिपक्व अभिनयलाई बोन्डका लागि उपयुक्त मानिएको छ । लामो समयदेखि पहिलो ’श्वेत बाहेकको’ बोन्डका रूपमा इद्रिस एल्बाको चर्चा भए पनि उनले स्वयंले यो भूमिकामा आफ्नो रुचि नरहेको संकेत दिइसकेका छन् । रेगे–जीन पेज ’ब्रिजरटन’ सिरिजबाट चर्चामा आएका पेज युवा पुस्ताका मनपर्ने कलाकार हुन् । उनको ’स्टाइलिस’ व्यक्तित्व बोन्डको चरित्रसँग मेल खान्छ ।