सांगीतिक आकाशमा ‘ओफेलिया’

विश्व संगीत बजारमा यतिबेला अमेरिकी पप आइकन टेलर स्विफ्टको पछिल्लो सिर्जना ‘द फेट अफ ओफेलिया’ले राज गरिरहेको छ । सन् २०२५ को अन्त्यतिर सार्वजनिक भएको उनको १२ औं स्टुडियो एल्बम ‘द लाइफ अफ अ शो गर्ल’ को यो मुख्य गीतले सन् २०२६ को सुरुवातसँगै नयाँ कीर्तिमानहरू थप्दै लगेको छ ।

विश्वकै प्रतिष्ठित सांगीतिक चार्ट ‘बिलबोर्ड हट १००’ मा लगातार नौ हप्तासम्म शीर्ष स्थानमा कब्जा जमाएर यस गीतले स्विफ्टको आफ्नै करियरका अघिल्ला सबै रेकर्डलाई उछिनेको छ । डिसेम्बरको जाडो र क्रिसमसका सदाबहार गीतहरूको प्रभावका कारण केही समय चार्टमा तल झरे पनि जनवरीको पहिलो हप्ताबाटै यो गीत पुनः नम्बर एकको स्थानमा फर्कन सफल भएको छ, जसलाई संगीत विश्लेषकहरूले ‘स्विफ्ट पावर’ को पुनरागमनका रूपमा व्याख्या गरेका छन् ।

सांगीतिक दृष्टिकोणले ‘द फेट अफ ओफेलिया’ एक सिन्थ–पप र डान्स– पप विधाको उत्कृष्ट फ्युजन हो । तर, यसको सफलताको मुख्य कडी भनेको गीतमा बुनिएको गहिरो र दार्शनिक कथावस्तु हो । विलियम शेक्सपियरको प्रख्यात नाटक ‘ह्यामलेट’ की दुखद पात्र ‘ओफेलिया’ को नामबाट प्रेरित यस गीतमा स्विफ्टले आधुनिक प्रेम, धोका र आत्म–बोधको गाथालाई कलात्मक ढंगले प्रस्तुत गरेकी छन् ।

प्रसिद्ध संगीत उत्पादक म्याक्स मार्टिन र ज्याक एन्टोनोफसँगको सहकार्यमा तयार पारिएको यस गीतमा ८० को दशकको ‘न्यु वेभ’ साउन्डको झल्को पाइन्छ, जसले पाका र युवा पुस्ता दुवैलाई आकर्षित गरेको छ । डिजिटल स्ट्रिमिङ प्लेटफर्म स्पोटिफाईमा एकै दिनमा सर्वाधिक स्ट्रिम हुने गीतको कीर्तिमान राखेको यस गीतले सामाजिक सञ्जालमा पनि ठूलो प्रभाव पारेको छ । विशेषगरी टिकटक र इन्स्टाग्राम रिल्समा यस गीतको म्युजिक भिडियोका दृश्य र संवादहरू भाइरल भइरहेका छन् ।

आलोचकहरूले यस गीतलाई स्विफ्टको ‘साहित्यिक पप’ को उच्च नमुना भनेका छन् । उनले शास्त्रीय साहित्यलाई आधुनिक पप संगीतमा जोडेर नयाँ पुस्तालाई कसरी मनोरञ्जन दिन सकिन्छ भन्ने कुरा पुनः प्रमाणित गरेकी छन् । यो गीतले आगामी सन् २०२६ को ग्रामी अवाड्र्समा ‘सङ अफ द इयर’ र ‘रेकर्ड अफ द इयर ’ जस्ता प्रमुख विधाहरूमा मनोनयन पाउने निश्चितजस्तै रहेको विश्लेषकहरूको भनाइ छ । संगीत उद्योगका विज्ञहरूका अनुसार ‘द फेट अफ ओफेलिया’ केवल एउटा हिट गीत मात्र नभएर यसले संगीत बजारमा टेलर स्विफ्टको अटल सांस्कृतिक प्रभाव र व्यवसायिक शक्तिलाई पुनः पुष्टि गरेको छ ।

विश्वभरका कन्सर्ट हलदेखि रेडियो स्टेसनहरूसम्म अहिले यही गीतको धुन गुञ्जिरहेको छ, जसले २०२६ को संगीतलाई नयाँ दिशानिर्देश गरिरहेको छ ।