‘कांग्रेस कसैको प्राइभेट कम्पनी होइन’

मलाई निर्वाचन आयोगलगायत सबै संस्थाहरूप्रति विश्वास छ । बहुमत महाधिवेशन प्रतिनिधिहरू जम्मा भएर विधिसम्मत ढंगले आएको परिणामलाई आयोगले मान्यता दिनेछ । मलाई कानून र संविधानप्रति विश्वास छ । नेपाली कांग्रेस कसैको प्राइभेट कम्पनी होइन कसैले कसैलाई निकाल्न । उहाँहरूले सहमहामन्त्री बद्री पाण्डेलाई निर्वाचन आयोगमा धर्ना राखेर हामीलाई निर्वाचन सार्न जालझेल गरिरहनुभएको रहेछ ।

मलाई कारवाही गरेको पत्र निर्वाचन आयोगमा पठाएर हामीलाई यता अलमल्याउने खेल भएको रहेछ । तर, हामीले पहिले नै विशेष महाधिवेशन उद्घाटनलगत्तै १४औं महाधिवेशनबाट निर्वाचित कार्य समिति भंग भएको र नयाँ कार्यसमिति महाधिवेशनबाट निर्वाचित भएपछि अद्यावधिक गराइन्छ भनेर पत्र पठाइसकेका थियौं । आज निर्वाचन प्रक्रिया सकिएसँगै आयोगलाई जानकारी गराउँछौं । पार्टीको चुनाव चिह्न रुख, चारतारे झण्डा हामीसँगै छ । अर्को कुरा कांग्रेस नै हामी हौं ।