अमेरिकाबाट ९० जना नेपाली डिपोर्ट

काठमाडौं । अमेरिकाले ९० जना नेपालीलाई फिर्ता पठाएको छ । अध्यागमन विभागका महानिर्देशक रामचन्द्र तिवारीका अनुसार डिपोर्ट गरिएकाहरू मंगलबार काठमाडौं आइपुगेका हुन् । अमेरिकाले चाटर्ड विमानमार्फत उनीहरूलाई काठमाडौँ ल्याएर छाडेको हो । वैधानिक कागजात नभेटिएका, गैरकानुनी बसेका, अध्यागमन कानुन उल्लंघन गरेको लगायतलाई नियन्त्रणमा लिएर अमेरिकाले देश निकाला गरेको हो । बलजफ्ती फिर्ता पठाइएकाहरूका २० वर्षदेखि अमेरिकामा बस्दै आएकाहरू पनि परेका छन् । ट्रम्प प्रशासनले आप्रवासन नीतिमा कडाइ गरेयता यसरी अहिलेसम्म ४०० भन्दाबढी नेपाली अमेरिकाबाट डिपोर्ट भइसकेको महानिर्देशक तिवारीले बताए । फिर्ता ल्याइएकाहरूमाथि अहिले प्रहरीको मानव बेचबिखन ब्युरोले अनुसन्धान गरिरहेको छ । बेचबिखनमा परेको भए उजुरी दिन ब्युरोले अनुरोध गरेको छ । आवश्यक अनुसन्धानपछि ब्युरोले परिवारको जिम्मा लगाउने जनाएको छ ।