जोशीको एकल प्रदर्शनी

ग्रामीण जनजीवनका दृश्य समेटेर चित्रकार सम्राट जोशीले एकल चित्रकला प्रदर्शनी गरेका छन् ।

बबरमहलस्थित सिद्धार्थ आर्ट ग्यालरीमा उनको पाँच दिनदेखि निरन्तर चित्रकला प्रदर्शन गरिरहेका छन् । ‘एन ओड टू द भ्याली’ शीर्षकमा राखिएका उनका चित्रले रङको सौन्दर्यसँगै गाउँले जीवनशैलीको महत्वलाई दर्शाएको छ भने काठमाडौं उपत्यकाको वास्तुकला सम्पदा र यहाँको दैनिकीबारे पनि चित्र प्रस्तुत गरिएका छन् ।

प्रदर्शनी नेवार वास्तुकला चित्रित भित्ताहरूबाट लिइएको छ, जहाँ चित्रकला केवल सजावटी मात्र नभई दैनिक जीवनमा निहित एक अभिन्न सांस्कृतिक र अनुष्ठान अभ्यास रहेको चित्रकार जोशीको भनाइ छ ।

ग्यालरीकी निर्देशक संगीता थापाले जोशीका चित्रहरू द्रुतरूपमा फैलिएको सहरी रूपान्तरणमा गाउँले परिवेशको सौन्दर्य र नेपालीपनको गरिमा बढाउने बताइन् । उनले जोशीका चित्रहरूले परम्परागत शैलीको खोज, अनुसन्धान र नयाँ पुस्तालाई विगतको जीवनशैली अध्ययन गर्नसमेत सघाउ पुर्‍याउने धारणा राखिन् । 

जोशीको कला प्रर्दशनीमा प्रमुख अतिथि रवीन्द्र पुरीले समकालीन कलात्मक अभ्यासलाई जोड दिँदै इतिहास, श्रमको महिमा कलामा समेटिनुपर्ने बताए । जोशीका चित्रले ग्रामीण जीवनको वैज्ञानिक अर्थसमेत महसुस गराउन सकेको उनको भनाइ छ ।

प्रदर्शनी आगामी फागुन ६ (फेब्रुअरी १८) गतेसम्म जारी रहनेछ ।