तेस्रो बृहत् राष्ट्रिय बालसाहित्य महोत्सव

बालबालिकामा पठन संस्कृति, सम्पदा, प्रविधि, साहित्य र शिक्षाबारे ज्ञान बढाउने उद्देश्यले तेस्रो बृहत् राष्ट्रिय बालसाहित्य महोत्सव सुरु भएको छ ।

तीन दिनसम्म सञ्चालन हुने नेपाल बालसाहित्य समाज, ललितपुर महानगरपालिका, पाटन संग्रहालयको आयोजना र विभिन्न संस्थाको सहआयोजनामा पाटन संग्रहालय परिसरमा महोत्सव सुरु भएको हो ।

महोत्सवको बाल गायिका कल्पना विष्टले उद्घाटन गरिन् । सोही अवसरमा बाल साहित्यकारहरू भिक्टर प्रधान, प्रमोद प्रधान, घनश्याम राजकर्णिकार र सिर्जना शर्मालाई रु १५/१५ हजार राशिको पुरस्कार प्रदान गरियो ।

समाजका अध्यक्ष विजयराज आचार्यका अनुसार महोत्सवमा बालसाहित्यसम्बन्धी राष्ट्रिय र अन्तरराष्ट्रिय विज्ञहरूबाट कार्यपत्र प्रस्तुति, बालसाहित्य र बालसरोकारसम्बन्धी विभिन्न विषयमा छलफल, बालसाहित्यसम्बन्धी पुस्तकको विमोचन र प्रदर्शनीलगायत गतिविधि हुनेछन् । काठमाडौं उपत्यकाका विभिन्न विद्यालयका विद्यार्थी, शिक्षक, अभिभावक र साहित्यकार–कलाकारको सहभागिता हुने महोत्वसमा रचना प्रस्तुति र बंगलादेशका वरिष्ठ साहित्यकार प्रा डा. मिजानुर रहमान कल्लोलको मुख्य प्रस्तुति रहने महोत्वसकी संयोजक यशोदा अधिकारीले जानकारी दिइन् ।