कांग्रेसले प्रतिस्पर्धी उम्मेदवारलाई गाली नगर्ने

काठमाडौं (संवाददाता)– सबैजसो निर्वाचनमा आफू राम्रो, अरु दल र उम्मेदवार नराम्रो भन्नु चलन जस्तै बनेको छ । एकअर्काविरुद्ध चर्को गालीगलौज संस्कारजस्तै रहिआएको छ । तर, कांग्रेसले यसपटक निर्वाचनको प्रचारका क्रममा कसैलाई पनि गाली नगर्ने नीति लिएको छ । अन्य दलका उम्मेदवारलाई गाली नगर्ने भएको हो । नयाँ संस्कार बनाउने भन्दै प्रतिस्पर्धी उम्मेदवारलाई गाली नै नगर्ने नीति पारित गरेको हो । 

पार्टीको कार्यसम्पादन समितिको आइतबार भएको भर्चुअल बैठकमा उपसभापति विश्वप्रकाश शर्माद्वारा प्रस्तुत ‘नेपाली कांग्रेस प्रतिनिधि सभा निर्वाचन परिचालन निर्देशिका –२०८२’ र ‘नेपाली कांग्रेस सार्वजनिक कार्यक्रम व्यवस्थापन निर्देशिका— ०८२’ लाई परिमार्जनसहित पारित गरेको छ । यसरी बैठकबाट पारित निर्वाचन परिचालन निर्देशिकामा प्रचारप्रसारका क्रममा गाली नगर्ने उल्लेख छ । 

निर्देशिकामा भनिएको छ, ‘नेपाली कांग्रेस आफ्ना प्रतिस्पर्धी पार्टीहरू र तिनका उम्मेदवारहरूबारे स्वस्थ टिप्पणी गर्ने, आलोचना गर्नुपर्दा विषयगत तर्कका साथ गर्ने तर गाली नगर्ने नीति अख्तियार गर्दछ ।’ निर्वाचन परिचालन समितिका संयोजक समेत रहेका उपसभापति शर्माको नेतृत्वमा कांग्रेसले यस्तो निर्देशिका बनाएको हो । शर्मा विपक्षीप्रति पनि सद्भाव राख्ने र राजनीति संस्कारयुक्त हुनुपर्ने पक्षमा वकाल गर्दै आउका नेता हुन् । उनले यसअघि झापा–१ मा चुनाव लड्दा पनि प्रतिस्पर्धीमाथि गाली नगर्ने नीति लिएका थिए । निर्वाचनको मैदान दुश्मनीको अखडा नभइ  विचार र व्यक्तित्व प्रतिस्पर्धाको महायज्ञ बनाउनुपर्नेमा कांग्रेस निर्देशिकाले जोड दिएको छ ।

‘निर्वाचनको मैदानलाई स्वस्थ र हार्दिक बनाउने कर्तव्य मूलतः दलहरूकै हो, यसमा अन्य सबै दललाई घच्घच्याउने भूमिकासमेत कांग्रेसले निर्वाह गर्नुछ र गर्नेछ,’ निर्देशिकामा उल्लेख छ । 

उपसभापति शर्माले कांग्रेस उम्मेदवार घृणास्पद, उत्तेजक र भड्काउ प्रकृतिका अभिव्यक्ति दिनबाट टाढा रहने र सुसंस्कृत राजनीतिको अभ्यास गर्ने बताए । सामान्य र स्वस्थ प्रकृतिको व्यङ्ग्य निर्वाचन मैदानमा स्वाभाविक भए पनि सार्वजनिक प्रस्तुति सम्पूर्णतः संयमित र परिपक्व रहने कांग्रेसले जनाएको छ । 

अनुशासन समिति गठन

कांग्रेसले केन्द्रीय सदस्य तारामान गुरुङको नेतृत्वमा ३ सदस्यीय अनुशासन समिति गठन गरेको छ । कार्यसम्पादन समितिको बैठकले अनुशासन समिति गठन गर्ने निर्णय पनि गरेको हो । समितिमा केन्द्रीय सदस्यहरु धना खतिवडा र सुवासकुमार पोखरेल सदस्य रहेको प्रवक्ता देवराज चालिसेले जानकारी दिए । कांग्रेस विधानमा ५ सदस्यीय अनुशासन समितिको व्यवस्था छ ।