तोकिएकै समयमा चुनाव हुन्छः कार्यवाहक प्रमुख आयुक्त

काठमाडौं । कार्यवाहक प्रमुख निर्वाचन आयुक्त रामप्रसाद भण्डारीले आगामी निर्वाचन तोकिएकै मिति र समयमा सम्पन्न हुने स्पष्ट पार्दै यसमा कुनै पनि शंका नगर्न आग्रह गरेका छन् । काठमाडौंमा आइतबार आयोजित एक कार्यक्रममा  उनले निर्वाचनको तयारी पूरा भइसकेकाले भ्रममा नपरी प्रचारप्रसारमा लाग्न उम्मेदवारहरूलाई सुझाव दिए । 
फागुन २१ गते प्रतिनिधिसभा निर्वांचनका लागि आयोगले तयारी पूरा गरिसकेको छ भने दलहरु अहिले मत माग्न व्यस्त छन् । तर, छिटपुट रुपमा केही ठाउँमा भएका विवादका घटनालाई लिएर निर्वाचन नहुने हो कि भन्ने शंका व्यक्त भइरहँदा उनले आश्वस्त पार्न खोजेका हुन् । 
केही तत्वहरूले निर्वाचन बिथोल्ने वा अस्थिरता सिर्जना गर्ने प्रयास गरिरहेको तर्फ संकेत गर्दै भण्डारीले त्यस्ता प्रायोजित हल्लाको पछि नलाग्न पनि आग्रह गरे । उनले भने, ‘निर्वाचनको विकल्प निर्वाचन नै हो । केही कुण्ठित व्यक्तिहरूले निश्चित स्वार्थका लागि हल्ला फैलाउन सक्छन्, तर अब नेपाली जनता त्यस्ता हल्लाको साक्षी बस्ने छैनन् ।’
उनले नयाँ र पुराना सबै राजनीतिक शक्तिहरूले निर्वाचनलाई नै निकासको मार्गका रूपमा स्वीकार गरिसकेको दाबी गरे । निर्वाचनको वातावरण बिगार्ने कुनै पनि गतिविधिलाई सरकारले निषेध गर्ने र आयोगले त्यस्ता क्रियाकलापको नजिकबाट अनुगमन गरिरहेको उनले बताए । 
निर्वाचन आचारसंहिताको प्रसंगमा उनले केही सञ्चार माध्यमहरूले गरिरहेको मत सर्वेक्षणप्रति असन्तुष्टि व्यक्त गर्दैै आयोगले पटक–पटक आग्रह गर्दा पनि अटेर गरेको बताउँदै आचारसंहिता विपरीतका कार्य नरोके कडा कारबाही गर्ने संकेत गरे । 
त्यस्तै, फरक सन्दर्भमा उनले आयोगबाट अनुमति लिएर निर्वाचन पर्यवेक्षणमा खटिएका व्यक्तिहरूको गतिविधिमाथि निगरानी गरिदिन सञ्चार माध्यमलाई आग्रह पनि गरे । केही व्यक्तिहरूले पर्यवेक्षणको नाममा मतदान स्थलमा पुगेर मतदान अधिकृतसँग अनावश्यक प्रश्न सोध्ने, मतदान प्रक्रियामा क्षणिक अवरोध सिर्जना गर्ने वा निर्वाचनलाई प्रभावित पार्ने प्रयास गर्नसक्ने उनले बताए । ‘हामीले अनुमति दिएर पर्यवेक्षण गर्न गएका निर्वाचन पर्यवेक्षक व्यक्तिहरू पनि हुनुहुन्छ । त्यहाँ पनि नजर पु¥याइदिन मैले आग्रह गरेँ । किनभने कोही यो निर्वाचन पर्यवेक्षण गर्नेका नाममा निर्वाचन पर्यवेक्षक गर्न अनुमति लिएर व्यक्तिगत स्वार्थको लागि निर्वाचनको समयमा केही तलमाथि गर्न सक्नेछन् । उहाँहरूले केही भन्दिनुहुन्छ कि, केही बोल्दिनुहुन्छ कि भन्ने मामिलामा पनि आयोग सचेत छ ,’ भण्डारीले भने ।