एक साथ पाँच कृति लोकार्पित

काठमाडौं । प्रा.डा.यादवप्रकाश लामिछानेका चार कृति र हुमकला पाण्डेद्वारा लामिछानेकै विषयमा लिखित एक अनुसन्धानमूलक कृतिसहित पाँच पुस्तकको लोकार्पण तथा परिचर्चा शनिबार वाल्मीकि क्याम्पस, प्रदर्शनीमार्गमा सम्पन्न भएको छ ।
विद्यार्थी पुस्तक भण्डारद्वारा प्रकाशित ‘संयोग’ कथासंग्रह, ‘यात्रा रहेछ जिन्दगी’ नियात्रासंग्रह, ‘स्मृतिका पानाहरू’ संस्मरणसंग्रह र ‘फरक सृष्टि फरक दृष्टि’ समालोचनासंग्रहका साथै पाण्डेद्वारा लिखित ‘नेपाली भाषाशिक्षणमा प्रा.डा.यादवप्रकाश लामिछानेको योगदान’ कृतिको संयुक्तरूपमा लोकार्पण गरिएको हो । समारोहको सभापतित्व प्रकाशनका प्रबन्ध सञ्चालक शान्त गौतमले गरेका थिए । प्रमुख अतिथि प्रा.डा.दयाराम श्रेष्ठ ‘सम्भव’ तथा विशिष्ट अतिथि प्रा.डा.जीवेन्द्र देव गिरीको उपस्थितिमा पाँचै कृतिको सार्वजनिक विमोचन गरिएको थियो ।
कार्यक्रममा स्रष्टा लामिछानेले आफ्ना कृति फरक–फरक विधाका भएकाले समालोचनात्मक दृष्टिबाट मूल्यांकन होस् भन्ने उद्देश्यले परिचर्चा आयोजना गरिएको बताए । आफू सिद्धान्त अध्यापन गर्ने शिक्षक भएकाले लेखनीमा तटस्थता र वस्तुगत दृष्टिकोण अपनाउने प्रयास गरेको उनको भनाइ थियो ।
परिचर्चाका क्रममा समालोचकहरूले कथासङ्ग्रहमा प्रगतिवादी चेत, सामाजिक यथार्थ र वर्गसंघर्षको अभिव्यक्ति सशक्त रूपमा आएको टिप्पणी गरे । नियात्रासङ्ग्रहमा दीर्घ समयावधिका अनुभव समेटिएको र समालोचनासङ्ग्रहमा दार्शनिक तथा प्रगतिशील दृष्टिकोण स्पष्ट देखिएको धारणा राखियो । संस्मरणसङ्ग्रहमा जीवनका सङ्घर्षपूर्ण भोगाइ र सामाजिक–राजनीतिक सन्दर्भ जीवन्त रूपमा प्रस्तुत भएको उल्लेख गरियो ।

अनुसन्धाता पाण्डेले लामिछानेको नेपाली भाषाशिक्षणमा योगदान अनुकरणीय रहेको र उनको शैक्षिक तथा वैचारिक भूमिका प्राज्ञिक क्षेत्रमा महŒवपूर्ण रहेको बताए ।
कार्यक्रममा साहित्यकार, प्राध्यापक तथा विभिन्न क्षेत्रका प्रबुद्ध व्यक्तित्वको उल्लेख्य उपस्थिति रहेको थियो ।