नेपाली श्रमिकको सुरक्षामा ध्यान दिन वैदेशिक रोजगार व्यवसायीको आग्रह

काठमाडौं । नेपाल वैदेशिक रोजगार व्यवसायी संघ (नाफिया) ले मध्यपूर्वका देशमा रोजगारीका लागि गएका नेपाली श्रमिकहरूको सुरक्षाका लागि उच्च सतर्कता अपनाउन सम्बन्धित सबै निकायसँग अनुरोध गरेको छ । संघले आइतबार विज्ञप्ती जारी गरी मध्यपूर्व क्षेत्रमा विकसित पछिल्लो सुरक्षा परिस्थितिप्रति गम्भीर ध्यानाकर्षण भएको जनाउँदै नेपाली श्रमिकहरूको सुरक्षाका लागि उच्च सतर्कता अपनाउन सम्बन्धित सबैमा अनुरोध गरेको हो । 
संघले मध्यपूर्वका देशहरूमा कार्यरत सम्पूर्ण नेपाली श्रमिकहरूलाई उच्च सतर्कता अपनाउन र सम्बन्धित देशका स्थानीय प्रशासनले जारी गरेका सुरक्षा निर्देशनहरूको पूर्ण पालना गर्न पनि अनुरोध गरेको छ । संघले  नेपाल सरकार, परराष्ट्र मन्त्रालय तथा विदेशस्थित नेपाली दूतावास एवं कूटनीतिक नियोगहरूलाई नेपाली नागरिकको सुरक्षाका लागि आवश्यक समन्वय, समयोचित सूचना प्रवाह तथा आपत्कालीन संयन्त्र प्रभावकारी रूपमा सञ्चालन गर्न आग्रह गरेको छ ।
त्यस्तै, मध्यपूर्वका देशहरूमा  सक्रिय विभिन्न संघ–संस्था तथा रोजगारदाता कम्पनीहरूसँग निरन्तर समन्वय गरी श्रमिकहरूको अवस्थाबारे नियमित जानकारी लिन र आवश्यक सहयोग उपलब्ध गराउन पनि संघले अपिल गरेको छ । संघले विशेष गरी उडान सञ्चालन गरिरहेका सम्बन्धित एयरलाइन्स कम्पनीहरूलाई यात्रु तथा नेपाली नागरिकको सुरक्षालाई उच्च प्राथमिकतामा राखी उडान व्यवस्थापन, सूचना प्रवाह, उद्धार तथा सहयोगमा जिम्मेवार भूमिका निर्वाह गर्न आग्रह गरेको छ ।
‘यस्तो विषम परिस्थितिमा हाम्रा नेपाली नागरिकको सुरक्षा सुनिश्चित गर्नु हामी सबैको साझा दायित्व हो,’ संघको विज्ञप्तिमा भनिएको छ । संघले वैदेशिक रोजगारीमा रहेका नेपालीको जीवन र सुरक्षालाई सर्वोपरि राखेर आवश्यक सबै पहल गर्न सम्बद्ध पक्षलाई आह्वान गरेको  छ ।
अमेरिका र इजरायलले इरानमाथि आक्रमण गरेपछि इरानले बहराइन, कतार, संयुक्त अरब इमिरेट्स (युएई) लगायत देशमा रहेका अमेरिकी सैन्य आधारहरूमा हवाई आक्रमण गरेपछि ती देशमा रोजगारीका लागि गएका नेपालीहरूको जनजीवन पनि प्रभावित हुन पुगेको छ ।