नक्कली बमले ९ घण्टा तनाव

रौतहट । सडकको बीच भागमा राखिएको फलामे ड्रमभित्र पहेँलो प्लास्टिकको बोरा, त्यसको वरिपरि बनाइएको गोलो घेरा र बाहिर ठूला अक्षरमा लेखिएको ‘बम्ब है ।’ चुनावको संघारमा स्थानीयलाई सतर्क बनाउन यो भन्दा बढी के चाहियो ? आइतबार राति करिब डेढ बजे राजपुर नगरपालिका–५ पानीटंकीस्थित राजपुर–अकोलवा भित्री पक्की सडकखण्डमा यस्तो थियो । 
स्थानीयवासी झस्किए । विस्तारै गाउँले उठे । हल्ला भयो । देश प्रतिनिधिसभा निर्वाचनको मुखमा छ । शंकास्पद वस्तुले गाउँ नै त्रसित बनायो ।
निर्वाचन सुरक्षाका लागि सेना, सशस्त्र प्रहरी बल र नेपाल प्रहरीको संयुक्त फौज परिचालित भइरहेका बेला यस्तो वस्तु फेला पर्नु अस्वाभाविक थिएन । जिल्ला प्रहरी कार्यालय रौतहटका प्रवक्ता डीएसपी विष्णुप्रदीप बस्यालका अनुसार स्थानीयले प्रहरीलाई खबर गरे । सुरक्षाकर्मी घटनास्थलमा पुगे, बिहान भइसकेको थियो । सडक वरिपरि घेरा हालियो र आवतजावत पूर्ण रूपमा बन्द गरियो । सम्भावित जोखिमलाई मध्यनजर गर्दै सर्वसाधारणलाई टाढा राखियो । 
गौरस्थित नारायणदल गणबाट नेपाली सेनाको बम डिस्पोजल टोली बोलाइयो । सोमबार बिहान करिब १० बजे आएको टोलीले आवश्यक सुरक्षात्मक प्रक्रिया पूरा गर्दै ड्रम खोलेर जाँच ग¥यो । केहीबेरको तनावपछि निष्कर्ष आयो – त्यो बम होइन रहेछ । बोरा खोल्दा भित्र माटो पोको पारेको भेटियो । 
नेपाली सेनाले उक्त घटनालाई ‘होक्स’ अर्थात् नक्कली त्रास सिर्जना गर्ने उद्देश्यले राखिएको वस्तु भएको जनाएको छ । नारायणदल गणका अनुसार प्रत्येक निर्वाचन क्षेत्रमा एक–एक बम डिस्पोजल टोली तथा राजमार्ग सुरक्षाका लागि अतिरिक्त टोली तैनाथ गरिएको छ । 
घटनापछि स्थानीय प्रशासनले अनावश्यक हल्ला नफैलाउन र कुनै पनि शंकास्पद वस्तु देखिएमा तुरुन्तै सुरक्षा निकायलाई खबर गर्न आग्रह गरेको छ । हाल उक्त क्षेत्रको सुरक्षा अवस्था सामान्य रहेको प्रहरीले जनाएको छ ।
यसैबीच, रौतहटका प्रमुख जिल्ला अधिकारी दिनेशसागर भुसालले निर्वाचन सुरक्षाका लागि १० हजारभन्दा बढी सुरक्षाकर्मी तथा जनशक्ति परिचालन गरिएको जानकारी दिए । प्रारम्भिक अनुसन्धानले राजपुरको घटना नियोजित नभई केही व्यक्तिले मदिरा सेवनपछि रमाइलोका लागि गरेको हुनसक्ने संकेत गरेको उनले बताए । ‘जिल्लाको समग्र सुरक्षा व्यवस्था कडा र व्यवस्थित छ । यस्ता घटनाले निर्वाचन प्रक्रियामा कुनै असर पर्दैन,’ उनले भने, ‘मतदाताले ढुक्क भएर मतदान गर्न सक्ने वातावरण बनाउन प्रशासन प्रतिबद्ध छ ।’
आगामी बिहीबार हुने प्रतिनिधिसभा निर्वाचनका लागि रौतहटमा ५४१ मतदान केन्द्र निर्धारण गरिएको छ । जिल्ला निर्वाचन अधिकारी छोटेलाल दासका अनुसार चार प्रतिनिधिसभा निर्वाचन क्षेत्रअन्तर्गत १५७ वडामा २७७ मतदान स्थल र ५४१ मतदान केन्द्र कायम गरिएको छ । तीमध्ये १५२ मतदान केन्द्र अति संवेदनशील, १०० संवेदनशील र २७ मतदान स्थल सामान्य श्रेणीमा राखिएको छ ।
१६ नगरपालिका र २ गाउँपालिका रहेको रौतहटमा कुल ४ लाख ३६ हजार ६११ मतदाता छन् । जसमध्ये २ लाख ४० हजार २६७ पुरुष, १ लाख ९६ हजार ३४३ महिला र १ जना अन्य मतदाता छन् ।