पिपल्स क्याम्पसमा डिजिटल बैंकिङ सचेतना कार्यक्रम

काठमाडौं । पिपल्स क्याम्पसमा न्यूज२४ टेलिभिजनद्वारा डिजिटल बैंकिङसम्बन्धी सचेतना कार्यक्रम सम्पन्न गरेको छ । डिजिटल प्रविधिको तीव्र विकाससँगै बैंकिङ कारोबार अनलाइन माध्यमबाट बढ्दै गइरहेका बेला सम्भावित ठगी र साइबर अपराधका जोखिमबारे जानकारी दिने उद्देश्यले कार्यक्रम आयोजना गरिएको हो ।
शुक्रबार आयोजित कार्यक्रममा क्याम्पस प्रमुख (प्रिन्सिपल) मनोजबहादुर कुँवर तथा सहायक प्रिन्सिपल रोजेस पण्डितको उपस्थिति थियो । कार्यक्रममा क्याम्पस प्रमुख कुँवरले डिजिटल बैंकिङ कारोबारको विस्तारसँगै ठगीका घटना पनि बढ्दै गएको उल्लेख गर्दै सजग र सावधानीपूर्वक कारोबार गर्न विद्यार्थी तथा सेवाग्राहीलाई आग्रह गरे । उनले यस्ता किसिमका सचेतनामूलक कार्यक्रमले विद्यार्थीलाई जोखिमबारे सचेत गराउन महŒवपूर्ण भूमिका खेल्ने विश्वास व्यक्त गरे ।
कार्यक्रममा आर्थिक पत्रकार चिरञ्जीवी भट्टराईले डिजिटल बैंकिङका विभिन्न माध्यम, अनलाइन भुक्तानी प्रणाली, मोबाइल बैंकिङ, क्यूआर कोड प्रयोगलगायतका विषयमा प्रस्तुति दिएका थिए । उनले असावधानीका कारण हुन सक्ने साइबर ठगी, फिसिङ, ओटीपी दुरुपयोगजस्ता जोखिमबारे जानकारी दिँदै सुरक्षित कारोबारका उपायबारे प्रकाश पारे ।
सहायक प्रिन्सिपल पण्डितले पनि डिजिटल ठगीका घटना बढ्दै गएका सन्दर्भमा यस्ता कार्यक्रमको सान्दर्भिकता अझ बढेको बताए । उनले विद्यार्थीलाई डिजिटल साक्षरता अभिवृद्धि गर्दै सुरक्षित बैंकिङ अभ्यास अपनाउन आग्रह गरे । कार्यक्रममा विद्यार्थीको सक्रिय सहभागिता थियो भने अन्त्यमा प्रश्नोत्तर सत्रसमेत सञ्चालन गरिएको थियो । आयोजकले आगामी दिनमा पनि यस्ता सचेतनामूलक कार्यक्रमलाई निरन्तरता दिने जनाएको छ ।