फोनपेको ‘सक्षम नारी’ अभियान सार्वजनिक

काठमाडौं । फोनपेले वार्षिक अभियान ‘सक्षम नारी’को तेस्रो संस्करण औपचारिक रूपमा सार्वजनिक गरेको छ । डिजिटल वित्तीय समावेशीकरणमार्फत महिलामा वित्तीय आत्मविश्वास अभिवृद्धि गर्ने उद्देश्यले सञ्चालन गरिएको यो राष्ट्रव्यापी अभियान सन् २०२६ मार्च १ देखि मार्च ३१ सम्म सञ्चालन हुने कम्पनीले जनाएको छ ।
अभियानले महिलालाई केवल वित्तीय पहुँचमा सीमित नराखी ती उपकरणलाई आत्मविश्वासका साथ प्रयोग गर्न प्रेरित गर्ने लक्ष्य राखेको छ । नेपालमा आज पहिलेभन्दा धेरै महिलाले वित्तीय सेवामा पहुँच पाएका छन् । तर, पहुँच मात्रले सशक्तीकरण सुनिश्चित गर्दैन । फोनपेको अनुभवअनुसार वास्तविक अन्तर उपलब्धतामा होइन, विश्वास, समझदारी र प्रयोगमा रहेको छ ।
सक्षम नारी अभियान यही अन्तरलाई सम्बोधन गर्दै क्रेडिटप्रति रहेको धारणा परिवर्तन गर्न र जिम्मेवार वित्तीय निर्णयलाई प्रोत्साहन गर्न केन्द्रित छ । यो वर्षको अभियानले ‘क्रेडिट डराउने विषय हो’ भन्ने लामो समयदेखिको सोचलाई चुनौती दिएको छ । फोनपेले क्रेडिट कार्डलाई अब वृद्धि, लगानी र दैनिक जीवनशैलीलाई सहज बनाउने साधनका रूपमा पुनःस्थापित गरेको बताइएको छ ।
अभियानको केन्द्रमा पूर्णरूपमा भर्चुअल फोनपे क्रेडिट कार्ड रहेको छ, जुन सहभागी बैंकहरूको मोबाइल बैंकिङ एपमार्फत सहज रूपमा सक्रिय गर्न सकिन्छ र भौतिक कार्डबिना नै सुरक्षित रूपमा कारोबार गर्न सकिन्छ ।
अभियानबारे फोनपेका प्रमुख कार्यकारी अधिकृत दिवस कुमारले भने, ‘साँचो वित्तीय समावेशीकरण भनेको मानिसलाई केवल सेवा उपलब्ध गराउनुमात्र होइन । ती सेवा प्रयोग गरेर आफ्नो जीवन सुधार्न सक्ने आत्मविश्वास दिनु हो । सक्षम नारीमार्फत हामी महिलालाई हिच्किचाहटबाट आत्मविश्वासतर्फ, डरबाट आर्थिक स्वतन्त्रतातर्फ अघि बढ्न सहयोग गरिरहेका छौँ ।’
यो अभियान सिद्धार्थ बैंक, लक्ष्मी सनराइज बैंक, कुमारी बैंक, एभरेस्ट बैंक र गरिमा विकास बैंकसँगको सहकार्यमा सञ्चालन भइरहेको छ । सहभागी बैंकका योग्य महिला ग्राहकले फोनपे क्रेडिट कार्ड सक्रिय गरी अभियान अवधिभित्र न्यूनतम तीनवटा कारोबार पूरा गरेर सहभागिता जनाउन सक्नेछन् ।
यो पहल नयाँ तथा विद्यमान दुवै प्रयोगकर्ताका लागि खुला छ, जसमा पहिलोपटक प्रयोग सुरु गर्नेहरूलाई विशेष रूपमा प्रोत्साहन गर्ने व्यवस्था गरिएको छ । अभियानअन्तर्गत फोनपेले साजुना ज्वेलर्ससँग सहकार्य गर्दै आकर्षक उपहारहरू घोषणा गरेको छ । प्रत्येक सहभागी बैंकबाट पाँच भाग्यशाली विजेताले विशेष डायमण्ड गहना सेट प्राप्त गर्नेछन् ।
यो मुख्य उपहार अभियान अवधिमा पहिलोपटक फोनपे क्रेडिट कार्ड सक्रिय गर्ने नयाँ प्रयोगकर्ताका लागि मात्र हुनेछ । साथै, प्रत्येक बैंकबाट ५० जना भाग्यशाली विजेताले पाँच हजार रूपैयाँबराबरको छुट भौचर प्राप्त गर्नेछन् । सहभागिता मापदण्ड पूरा गर्ने नयाँ तथा पुराना दुवै प्रयोगकर्ता यस पुरस्कारका लागि योग्य हुनेछन् ।
सक्षम नारी २०२६ मार्फत फोनपेले वित्तीय पहुँचमात्र नभई वित्तीय आत्मविश्वास निर्माण गर्ने प्रतिबद्धतालाई दोहो¥याएको छ । अभियानले देशभरका महिलालाई स्पष्टता, नियन्त्रण र आत्मनिर्भर निर्णयमार्फत वित्तीय भविष्य स्वयं निर्माण गर्न प्रेरित गर्ने विश्वास गरिएको छ ।