गोकुल बाँस्कोटाको क्षेत्रमा बदन भण्डारीले कटाए ५३ हजार मत

काभ्रे, धुलिखेल । काभ्रे क्षेत्र नम्बर २ को अन्तिम नतिजा आएको छ । जसमा रास्वपाका बदन भण्डारी अत्याधिक मतका साथ विजयी भएका छन् । उनले ५३ हजार ३ सय ४४ मत ल्याउँदा प्रतिस्पर्धी नेपाली कांग्रेसका मधु आचार्यले १७ हजार ८ सय ६८ मत ल्याएका छन् ।
यहाँ एमालेका अशोक व्याञ्जुले १३ हजार ९ सय ४०, नेकपाका वसुन्धरा हुमागाईंले ८ हजार १ सय ७ मत ल्याए भने उज्यालो नेपालकी ज्योत्सना सैंजुले ३ हजार ७ सय ४९ मत ल्याएकी छिन् । राप्रपाका रन्जिब श्रेष्ठले १ हजार १ सय २५ मत ल्याएका छन् ।
बिहीबार भएको मतदानमा काभ्रेमा १ लाख ९७ हजार ३ सय ४१ मत खसेको थियो । जम्मा ३ लाख २६ हजार ६ सय ११ मतदाता रहेको जिल्लाको क्षेत्र नम्बर १ मा १ लाख ६१ हजार १ सय मतदाता रहेका थिए । यस क्षेत्रमा ९१ हजार १ सय २८ मत खसेको थियो । यस्तै क्षेत्र नम्बर २ मा कूल १ लाख ६५ हजार ५ सय ११ मतदाता रहेका थिए । यहाँ १ लाख ६ हजार २ सय १३ मत खसेको थियो । 
को हुन् भण्डारी ?
काभ्रेपलाञ्चोक जिल्लाको भुम्लु गाउँपालिका–२ सिम्थलीमा जन्मिएका बदन भण्डारी न्यूनवर्गीय परिवारबाट संघर्ष, मिहेनत र आत्मविश्वासका साथ आफ्नै खुट्टामा उभिन सफल व्यक्ति हुन् । भण्डारी यसअघि एक स्थापित ई–कमर्श व्यवसायी, अनुभवी मिडियाकर्मी तथा सक्रिय सामाजिक अभियन्ताका रूपमा परिचित थिए ।
विद्यालय जीवनदेखि नै कक्षाको प्रथम हुने भण्डारीले काठमाडौँस्थित कैलाशकुट बहुमुखी क्याम्पस, मित्रपार्कबाट स्नातक अध्ययन पूरा गरेका छन् । सामाजिक सेवामा पनि भण्डारी अग्रपंक्तिमा रहँदै आएका छन् । लायन्स क्लबमार्फत २०७२ सालदेखि निरन्तर सामाजिक सेवामा संलग्न उनी भूकम्प, कोरोना महामारी, बाढीपहिरो लगायतका विपद्का समयमा पीडितको सेवामा सक्रिय रहे ।
राजनीतिकरूपमा विगत २० वर्षदेखि सक्रिय भण्डारी हाल राष्ट्रिय स्वतन्त्र पार्टीको केन्द्रीय सार्वजनिक मामिला विभागको सचिवका रूपमा कार्यरत छन् । यसअघि एमाले र एकीकृत समाजवादीमा रहेका उनी यसपटक काभ्रे क्षेत्र नम्बर २ बाट प्रतिनिधि सभा सदस्यको निर्वाचनमा उम्मेदवार रहँदै विजयी भए । यसका साथै उनी जनताको आवाज संसद्सम्म पु¥याउने उद्देश्यसहित आफू सक्रिय राजनीतिक यात्रामा रहेको बताउँछन् ।
भण्डारीको मुख्य उद्देश्य जनमुखी, उत्तरदायी र पारदर्शी शासन प्रणाली स्थापना गर्नु, स्थानीय आवश्यकताअनुसार विकास र रोजगारी सिर्जना गर्नु, युवालाई उद्यमशीलता र अवसरसँग जोड्ने नीति अघि बढाउनु तथा समाजका सबै वर्गका लागि न्याय र सम्मान सुनिश्चित गर्ने राजनीति गर्नु रहेको बताउँछन् । देश परिवर्तन नयाँ पुस्ताबाट मात्र सम्भव रहेको दाबीसहित आफू निर्वाचनमा होमिएको उनको भनाइ थियो । ३३ वर्षीय भण्डारी यतिबेला काभ्रे क्षेत्र नम्बर २ मा आकर्षणको केन्द्रमा छन् । उनले यस निर्वाचनमा अनुभवी मानिएका पुराना दलका शीर्ष नेताहरुलाई पाखा लगाएका छन् । यो क्षेत्रमा यसअघि नेकपा एमालेका प्रभावशाली नेता गोकुल बाँस्कोटा विजयी हुँदै आएका थिए ।