झरीमा रुझ्दै लगाए नारा, महानगरले सुनेन

काठमाडौं (संवाददाता)– आफूहरूलाई जबर्जस्ती विस्थापित गर्न खोजिएको भन्दै आन्दोलित कबाडी व्यवसायीले बिहीबार चौथो दिन पनि काठमाडौं महानगरपालिकाविरुद्ध प्रदर्शन गरेका छन् । 

वर्षामा भिज्दै भृकुटीमण्डपबाट कमलादीस्थित काठमाडौं महानगरपालिको कार्यालय अगाडि पुगेर उनीहरूले नाराबाजी गरेका छन् । राष्ट्रिय झण्डा बोकेका उनीहरूले सडकमा भिज्दै नारा लगाए । सर्वोच्च अदालतको आदेशविपरीत काठमाडौं महानगरपालिका प्रमुख बालेन्द्र शाहले ज्यादती गरिरहेको भन्दै उनीहरू आन्दोलित भएका हुन् । 

अदालतको आदेश पालना गर्नुपर्ने र कबाड व्यवसायीलाई शान्तिपूर्ण वातावरणमा व्यवसाय गर्न दिनुपर्ने उनीहरूको माग छ । महानगरपालिकाले अव्यवस्थित कबाडी संकलन केन्द्रहरू हटाउन थालेपछि कबाड व्यवसायी रुष्ट छन् । उनीहरूको आरोप छ – महानगरले दर्ता, कर र व्यवस्थापनका नाममा जबर्जस्ती डिपो हटाउँदै आएको छ, तर वैकल्पिक व्यवस्था गरेको छैन । 

यसरी एकतर्फी निर्णय गर्दा हजारौं परिवारको रोजगारी संकटमा पर्ने उनीहरूको गुनासो छ । गत वर्षदेखि नै कबाडी व्यवसायी र महानगरबीच तनाव बढ्दै आएको हो । अदालतले तत्काल डिपो नहटाउन आदेश दिएको भए पनि महानगरले त्यसको बेवास्ता गर्दै आएको व्यवसायीको भनाइ छ । 

महानगरपालिकाले सडक छेउछाउ र सार्वजनिक स्थानमा अव्यवस्थितरूपमा सामान थुपारिएका डिपोले वातावरण प्रदूषण बढाएको र व्यवस्थापनमा समस्या देखाएको कारण हटाउनुपर्ने बताउँदै आएको छ । महानगरको वातावरण शाखाका अनुसार व्यवस्थित दर्ता र मापदण्डमा गएर मात्र व्यवसाय सञ्चालन गर्न दिने नीति छ । 

तर, व्यवसायीहरूले तत्काल वैकल्पिक स्थान नतोकी गरिएको कारबाही अमान्य रहेको तर्क गरेका छन् । उनीहरूले आफ्नो व्यवसायलाई दमन होइन, व्यवस्थित गर्ने खालको सहकार्य चाहिएको बताउँदै आएका छन् ।

तस्विर : नेपाल फोटो लाइब्रेरी