ऊर्जा क्षेत्रका ३ प्रतिनिधि संसद् प्रवेश

काठमाडौं । प्रतिनिधिसभा सदस्यका लागि फागुन २१ मा सम्पन्न निर्वाचनबाट ऊर्जा क्षेत्रसँग प्रत्यक्ष जोडिएका तीन जनाले संसदमा प्रवेश पाएका छन् । निर्वाचनमा ऊर्जा क्षेत्रसँग जोडिएका नौ जनाले प्रत्यक्षतर्फ उम्मेदवारी दिएर चुनावी प्रतिस्पर्धामा उत्रिएकोमा तीन जना मात्रै जित हासिल गर्दै संसद प्रवेशको यात्रा सुनिश्चित गर्न सफल भएका हुन् ।
तीन जना नै राष्ट्रिय स्वतन्त्र पार्टी (रास्वपा) का तर्फबाट प्रत्यक्ष निर्वाचनमा सहभागी भई विजयी भएर प्रतिनिधिसभा सदस्यको रूपमा संसदमा प्रवेश पाएका हुन् । जलविद्युत् उद्यमी एवं जलविद्युत् आयोजनाका लागि विस्फोटक पदार्थ व्यवस्थापनको काम गर्दै आएका भरतप्रसाद पराजुलीले सिन्धुपाल्चोकको क्षेत्र नम्बर–१ बाट विजयी हासिल गरेका छन् । उनले २४ हजार ४१२ मत प्राप्त गरे भने निकटतम प्रतिद्वन्द्वी नेपाली कम्युनिस्ट पार्टी (नेकपा) का उम्मेदवार माधव सापकोटाले १७ हजार ३२७ मत मात्रै पाउँदा पराजुलीको संसद प्रवेशको यात्रा सुनिश्चित भएको हो ।
पराजुली स्वतन्त्र ऊर्जा उत्पादकहरूको संस्था, नेपाल (इप्पान) को वर्तमान कार्यसमिति सदस्य पनि हुन् । उनले नेतृत्व गरेर लगानी गरेका दुई जलविद्युत् आयोजना सिन्धुपाल्चोकको जुगल गाउँपालिकामा निर्माणाधीन छन् । ३५.४७ मेगावाटको ब्रम्हायणी र १५.१५ मेगावाटको माथिल्लो ब्रम्हायणी लगानी व्यवस्थापन भई अहिले निर्माणको चरणमा छन् । उनले ऊर्जा क्षेत्रमा व्याप्त नीतिगत व्यवधानका मुद्दा संसदमा उठान गर्ने उद्देश्यले नै यसपटक निर्वाचनमा उम्मेदवारी दिएको उनले भनेका थिए ।
यस्तै, ऊर्जा क्षेत्र तथा सुरुङ निर्माणमा लामो अनुभव भएका इन्जिनियर श्रीराम न्यौपाने पनि निर्वाचनमा विजयी हुँदै संसद प्रवेश गरेका छन् । उनी पनि राष्ट्रिय स्वतन्त्र पार्टीका तर्फबाट तनहुँ क्षेत्र नम्बर–२ बाट विजयी भएका हुन् । उनले ३२ हजार ६८७ मत प्राप्त गरी यो निर्वाचनमा जित निकालेका हुन् । उनले निकटतम प्रतिद्वन्द्वी नेपाली काँग्रेसका शंकर भण्डारीलाई पराजित गर्दै प्रतिनिधिसभा सदस्यकोरूपमा संसद प्रवेशको यात्रा सुनिश्चित गरेका हुन् । भण्डारीले १४ हजार १३५ मत मात्रै ल्याउँदा न्यौपानेको संसद यात्रा सहज बनेको हो ।
न्यौपानेले यसअघि रास्वपाको केन्द्रीय ऊर्जा तथा जलस्रोत विभाग प्रमुख भएर पनि काम गरेका थिए । साथै, उनीसँग सञ्चालनमा आउन लागेको नागढुंगा सुरुङमार्ग निर्माणको अनुभव छ । उनले यो सुरुङमार्ग आयोजनामा आयोजना निर्देशक भएर काम गरेका थिए ।
यस्तै, दर्जनौं जलविद्युत् आयोजनासँग प्रत्यक्ष जोडिएर काम गरेका इन्जिनियर दीपककुमार साहले पनि राष्ट्रिय स्वतन्त्र पार्टीको तर्फबाट निर्वाचित भई संसदमा प्रवेश पाएका छन् । उनले सुनसरी क्षेत्र नम्बर ४ मा नेपाली कांग्रेसका उम्मेदवार एवं पूर्वअर्थमन्त्री ज्ञानेन्द्रबहादुर कार्कीलाई पराजित गरी संसद प्रवेशको यात्रा सुनिश्चित गरेका हुन् । साहले ३१ हजार ६६८ मत प्राप्त गरेका छन् । उनीसँग पराजित पूर्व अर्थमन्त्री कार्कीले १९ हजार ९६४ मत ल्याएका छन् । तेस्रो हुने नेकपा एमालेका जगदीशप्रसाद कुसियैतले ६ हजार ५९३ नम्बर मत ल्याएका छन् ।

घिसिङसहित ६ पराजित 
नेपाल विद्युत् प्राधिकरणमा दुई कार्यकाल कार्यकारी निर्देशकको जिम्मेवारीमा रही काम गरेर ऊर्जा, जलस्रोत तथा सिँचाइ मन्त्रीसमेत बनेका कुलमान घिसिङ निर्वाचनमा पराजित भएका छन् । उज्यालो नेपाल पार्टी गठन गरी निर्वाचनमा होमिएका घिसिङ काठमाडौं क्षेत्र नम्बर ३ बाट राष्ट्रिय स्वतन्त्र पार्टीका राजनाथ पाण्डेसँग पराजित हुँदा संसद् प्रवेशको यात्रामा पूर्णविराम लागेको हो ।
पाण्डेले १८ हजार ७५७ मत प्राप्त गरी जित हासिल गर्दा घिसिङले ११ हजार १७१ मत मात्रै प्राप्त गर्न सके । घिसिङले निर्वाचनमा जित हासिल गर्ने अपेक्षा गरिए पनि त्यसो हुन सकेन । घिसिङको पार्टीसँग आबद्ध भएका निर्वाचनमा होमिएका कुशल गुरुङ पनि कास्की क्षेत्र नम्बर २ बाट पराजित भएका छन् ।
कास्की २ बाट राष्ट्रिय स्वतन्त्र पार्टीका उत्तमप्रसाद पौडेलले ३१ हजार ९११ मत प्राप्त गरी जित हासिल गर्दा गुरुङ भने छैटौं स्थानमा मात्रै आए । उनले १ हजार २०१ मत मात्रै प्राप्त गर्न सके । उनले प्राप्त गरेको मत नेपाली काँग्रेस, नेकपा एमाले, राष्ट्रिय प्रजातन्त्र पार्टी र नेपाली कम्युनिस्ट पार्टी (नेकपा) का उम्मेदवारको भन्दा कम हो ।
यस्तै, घिसिङले नेतृत्व गरेको उज्यालो नेपाल पार्टीबाट उम्मेदवारी दिएका नेपाल विद्युत् प्राधिकरणका पूर्वप्रबन्धक दीपक चौधरी सप्तरी क्षेत्र नम्बर २ बाट पराजित भएका छन् । ३४ जनाको उम्मेदवारी परेको यस क्षेत्रमा उनी १६औं नम्बरमा पुगेका छन् । यो क्षेत्रबाट राष्ट्रिय स्वतन्त्र पार्टीका रामजी यादव २८ हजार ४०४ मत प्राप्त गरी विजयी हुँदा चौधरीको भने जमानत नै जफत हुने अवस्था आएको छ ।
उनी विद्युत् प्राधिकरणमा २२ वर्ष सेवा गरी प्रबन्धक पदबाट राजीनामा दिई राजनीतिमा होमिएका थिए । विकास विज्ञ, कुशल व्यवस्थापक, अनुसन्धानकर्ता र सामाजिक अभियन्ताको रूपमा चर्चित भएपनि निर्वाचनमा चौधरी प्रभाव नदेखिँदा लज्जास्पद पराजय भएको छ ।
यस्तैगरी, उद्योगी तथा व्यवसायी इन्जिनियर सुरज पाण्डे पनि पराजित हुन पुगेका छन् । उज्यालो नेपाल पार्टीका तर्फबाट रुपन्देही क्षेत्र नम्बर २ बाट चुनावी प्रतिस्पर्धामा उत्रिएका उनी पराजित भएका हुन् । यो क्षेत्रबाट पूर्वअर्थमन्त्री विष्णु पौडेललाई भारी मतान्तरले हराउँदै राष्ट्रिय स्वतन्त्र पार्टीका सुलभ खरेल ५६ हजार ५५० मत प्राप्त गरी विजयी हुँदा उनी भने प्रतिस्पर्धामै आउन सकेनन् । काठमाडौं विश्वविद्यालयबाट इन्जिनियरिङ अध्ययन पूरा गरेका उनले जलविद्युत् उत्पादन, आपूर्ति तथा वितरणको क्षेत्रमा सक्रिय भएर काम गरेको भए पनि जनताले नपत्याउँदा संसद प्रवेशको यात्रामा पूर्ण विराम लाग्यो ।
यस्तै, वैकल्पिक ऊर्जा प्रवद्र्धन केन्द्रको पूर्वकार्यकारी निर्देशकको जिम्मेवारीमा रही काम गरेका गोविन्दराज पोखरेल पनि यो निर्वाचनमा पराजित भएका छन् । नेपाली कांग्रेसका तर्फबाट प्युठान १ बाट चुनाव लडेका पोखरेल राष्ट्रिय स्वतन्त्र पार्टीका सुशान्त वैदिकसँग पराजित भएका हुन् । युवा उम्मेदवार वैदिक २७ हजार ४६९ मत प्राप्त गरी विजयी हुँदा पोखरेलले १८ हजार ३३८ मत मात्रै प्राप्त गर्न सके । उनी यसअघि २०७९ सालको निर्वाचनमा पनि नेकपा एमालेका सूर्य थापासँग पराजित भएका थिए ।
राष्ट्रिय योजना आयोगको पूर्वउपाध्यक्षसमेत रहेका उनी ऊर्जा, विकास योजना र सार्वजनिक नीति निर्माण तहका अनुभवी विज्ञ हुन् । ऊर्जा अर्थशास्त्र र विकास नीतिको अध्ययन, अनुसन्धान तथा अध्यापनसँग जोडिएका पोखरेल त्रिभुवन विश्वविद्यालयअन्तर्गत इन्जिनियरिङ अध्ययन संस्थानका प्राध्यापक हुन् । बौद्धिक व्यक्तित्व तथा ऊर्जा क्षेत्रमा सक्रिय भई काम गरेको अनुभव भए पनि पोखरेल राजनीतिमा भने सफल हुन सकेनन् ।
त्यस्तै, महोत्तरी १ बाट नेपाली कांग्रेसका उम्मेदवार बनेका नेपाल विद्युत् प्राधिकरणका पूर्वकार्यकारी निर्देशक मुकेशराज काफ्ले पनि पराजित भएका छन् । उनको निर्वाचन क्षेत्रबाट राष्ट्रिय स्वतन्त्र पार्टीका प्रमोदकुमार महतो ३४ हजार ६३६ मत प्राप्त गरी विजयी हुँदा काफ्ले ६ हजार २१३ मत प्राप्त गरी चौथो स्थानमा रहे ।
यसैगरी, जलविद्युत् क्षेत्रमा आबद्ध इन्जिनियर वीरेन्द्र श्रेष्ठ पनि यो निर्वाचनमा पराजित भएका छन् । राष्ट्रिय स्वतन्त्र पार्टीको तर्फबाट ताप्लेजुङ १ बाट चुनावी प्रतिस्पर्धामा उत्रिएका श्रेष्ठले पाँचौँ स्थान मात्रै पाप्त गर्न सके । उनले ४ हजार १५५ मत मात्रै प्राप्त गर्दा संसद प्रवेशको यात्रामा ब्रेक लाग्न पुग्यो । यो क्षेत्रबाट नेकपा एमालेका क्षितिज थेबे १३ हजार ९६२ मत ल्याई विजयी भएका छन् ।