अन्तर्राष्ट्रिय नारी दिवसमा ‘टीका’को घोषणा

काठमाडौँ । अन्तर्राष्ट्रिय नारी दिवसको अवसर पारेर भविष्य खड्का फिल्मस् र थर्ड आइ आट्र्सको संयुक्त ब्यानरमा नयाँ फिल्मको घोषणा गरिएको छ । नेपाली समाजमा महिलाले भोग्ने संघर्ष, आत्मसम्मान, अस्तित्व र आत्मनिर्भरताका विषयमा फिल्म बनाइन लागेको निर्माण समूहले बताएको छ । फिल्मको नाम ‘टीका’ राखिएको छ । 
मे ८ को अवसर पारी थिम पोस्टर सार्वजनिक गरिएको छ । फिल्मलाई शंकर कार्कीले निर्देशन गर्ने भएका छन् ।
फिल्मको थिम पोस्टरमा ‘टीका’लाई रातो गोलाकारभित्र सेतो अक्षरमा प्रस्तुत गरिएको छ । यसले कथामा विद्रोह, संघर्ष, शान्ति र नैतिक स्वच्छताको भाव झल्काउन खोजिएको निर्माण पक्षले बताएको छ । 
फिल्मको उपशीर्षक ‘राज्यविहीन आत्मा’ राखिएको छ, जसले आफ्नो पहिचान खोजिरहेको व्यक्तिको संघर्षमा कथा केन्द्रित हुने जनाउँछ । यद्यपि, फिल्मको कथावस्तुबारे निर्माण पक्षले केही खुलाएको छैन ।
यसअघि सुपरहिट फिल्म ‘जेरी अन टप’ निर्माण गरिसकेकी निर्मात्री भविष्य खड्काले यसमा लगानी गरेकी छन् । फिल्ममा महेश त्रिपाठी, ऋचा शर्मा, वर्षा सिवाकोटी, निर्मल शर्मा अनुबन्धित भइसकेका छन् भने बाल कलाकार आयुशी ढकालको पनि मुख्य भूमिका रहनेछ । अन्य कलाकार र प्राविधिक छनोटको चरणमा रहेको बताइएको छ ।
फिल्ममा चन्दन झा र निर्देशक कार्कीले कथा लेखेका छन् भने पटकथा रामकुमार श्रेष्ठले लेखेका छन् । सम्पूर्ण कलाकार तथा प्राविधिकहरु तय भइसकेपछि फिल्मको औपचारिक निर्माण घोषणा गरेर यसै वर्ष छायांकन सुरु गर्ने योजनामा निर्माण पक्ष रहेको छ । छायांकनमा जाँदै गर्दा फिल्मको प्रदर्शन मिति समेत घोषणा गरिने फिल्मका कलाकार निर्मल शर्माले बताएका छन् ।
यसैगरी अन्तर्राष्ट्रिय नारी दिवसको अवसर पारी चलचित्र विकास बोर्डले दुई पुराना चलचित्रहरू ‘कुमारी’ र ‘जीवन काँडा कि फूल’को प्रदर्शन गरिएको छ । दुई अलग कालखण्डमा निर्माण गरिएका यी दुई फिल्मले फरक अवस्थामा महिलाले कसरी संघर्ष गर्नुपर्छ भनी देखाएको छ ।
कुमारी चलचित्र विजय मल्लद्वारा लिखित कुमारी शोभा उपन्यासमा आधारित छ भने जीवन काँडा कि फूल साहित्यकार झमक कुमारीको वास्तविक जीवनमा आधारित फिल्म हो ।