‘कांग्रेसलाई आत्ममन्थनको अवसर’

काठमाडौँ । नेपाली कांग्रेसका नेता शंकर तिवारीले हालै सम्पन्न प्रतिनिधिसभा निर्वाचनको परिणामले देशमा परिवर्तनको पक्षमा जनताको स्पष्ट अभिमत प्रकट भएको बताएका छन् । उनले भाद्र २३÷२४ गतेको ‘जेन्जी उथलपुथल’को पृष्ठभूमिमा घोषणा भएको र फागुन २१ गते सम्पन्न निर्वाचनले आम मतदाताले परिवर्तन चाहेको सन्देश दिएको उल्लेख गरेका छन् ।
निर्वाचन परिणाम सार्वजनिक भएपछि जारी विज्ञप्तिमा तिवारीले बालेन्द्र शाह र रवि लामिछाने नेतृत्वको राष्ट्रिय स्वतन्त्र पार्टी (रास्वपा)लाई विजयका लागि बधाई दिएका छन् । उनले विजयी शक्तिलाई जनताको आशा र भरोसाको कसीमा खरो उत्रन शुभकामना दिएका छन् ।
विज्ञप्तिमा उनले निर्वाचन परिणामले नेपाली कांग्रेसलाई ऐतिहासिक पाठ सिकाएको बताउँदै निर्वाचनको मुखमा विशेष महाधिवेशनमार्फत नयाँ नेतृत्व चयन गरेको कांग्रेसले अहिले कुनै अलमल वा दुविधामा नपरी आत्ममन्थन गर्न आवश्यक रहेको जनाएका छन् । उनका अनुसार पार्टीभित्र आपसी आरोप–प्रत्यारोपमा अल्झिनुभन्दा पनि आफ्नो राजनीतिक औचित्य स्थापित गर्न नयाँ ढङ्गबाट समीक्षा गर्नुपर्ने समय आएको छ ।
तिवारीका अनुसार कांग्रेसभित्र अहिले दुई प्रकारका धारणा देखिएका छन्। पहिलो धारणा विशेष महाधिवेशन सही निर्णय भएको र त्यसैको आधारमा पार्टीलाई अगाडि बढाउनुपर्ने भन्ने रहेको छ भने अर्को धारणा विशेष महाधिवेशन गलत भएको र त्यसअघिको अवस्थाबाट संगठनलाई अघि बढाउनुपर्ने भन्ने रहेको छ।
उनले नेपाली कांग्रेस स्थापनाकालदेखि नै राष्ट्रिय शक्ति रहेको उल्लेख गर्दै सत्ता, प्रतिपक्ष, निर्वासन वा सडक—जुनसुकै अवस्थामा पनि पार्टीले राष्ट्रिय दायित्व निर्वाह गर्दै आएको बताएका छन् । तर अहिलेको आवश्यकता भनेको त्यो दायित्व निर्वाह गर्न सक्ने गरी कांग्रेसलाई समयानुकूल रूपान्तरण गर्नु रहेको उनको भनाइ छ ।
तिवारीले नेपालको इतिहासमा सबैभन्दा धेरै पटक चुनाव जित्ने र हार्ने दुवै अनुभव भएको शक्ति पनि नेपाली कांग्रेस नै भएको स्मरण गराउँदै पार्टी कहिल्यै तेस्रो शक्ति बनेको इतिहास नरहेको बताए । अहिले पनि कांग्रेस संसदको दोस्रो शक्तिका रूपमा वैधानिक प्रतिपक्ष रहने उल्लेख गर्दै उनले विशेष महाधिवेशनबाट प्राप्त उपलब्धिलाई जगेर्ना गर्दै अगाडि बढ्नु नै उपयुक्त विकल्प भएको बताएका छन् ।
उनले पार्टीभित्रको असन्तोष वैधानिक रूपमा विस्फोट भएको विशेष महाधिवेशनमाथि प्रश्न उठाउनु पश्चगमन हुने तर्क गरेका छन् । तिवारीले विशेष महाधिवेशनमार्फत ढिलो भए पनि समस्याको समाधान खोजिएको स्वीकार गर्दै अब यथाशीघ्र नियमित महाधिवेशनतर्फ अघि बढ्नुपर्ने धारणा व्यक्त गरेका छन् । त्यसका लागि विशेष महाधिवेशनबाट निर्वाचित नेतृत्वले सुझबुझपूर्ण निर्णय गर्दै मार्ग प्रशस्त गर्नुपर्ने उनले बताए ।
तिवारीले कुनै पनि निर्वाचन परिणाम स्थायी नहुने उल्लेख गर्दै यस्ता परिणामहरू समयसँगै परिवर्तन भएको उदाहरण पनि स्मरण गराएका छन् । कांग्रेसले लिएको मध्यमार्गी राजनीतिक बाटोले विभिन्न संकटका बेला देशलाई निकास दिएका, संविधानप्रति स्पष्ट प्रतिबद्धता नभएको तथा औपचारिक रूपमा पार्टी संरचना पूर्ण रूपमा स्थापित नभइसकेको शक्तिले प्राप्त गरेको मतका कारण कांग्रेस हतास हुनुपर्ने अवस्था नरहेको उनले बताएका छन् ।