समानुपातिकतर्फ रास्वपाले कटायो ३६ लाख मत, अरु दलको कति ?

काठमाडौँ । फागुन २१ गते सम्पन्न प्रतिनिधि सभा सदस्य निर्वाचनमा राष्ट्रिय स्वतन्त्र पार्टी (रास्वपा)ले प्रत्यक्षमा जस्तै समानुपातिकमासमेत ऐतिहासिक मत पाएको छ ।

प्रत्यक्षतर्फको १६१ सिटको मतगणना भइसक्दा अहिलेसम्म रास्वपाले १२४ सिट जितेको छ । रास्वपा अब एक क्षेत्रमा अगाडि छ । समानुपातिकतर्फ भने रास्वपाले ३६ लाख ५० हजार २१ मत पाएको छ ।

दोस्रो दल बन्न लागेको नेपाली कांग्रेसले प्रत्यक्षमा १७ सिटमा चित्त बुझाउँदा समानुपातिकतर्फ १२ लाख ३० हजार ३६२ मत पाएको छ ।

प्रत्यक्षमा तेस्रो स्थानमा रहेको नेकपा (एमाले)ले आठ क्षेत्रमा जित निकाल्दा एक क्षेत्रमा अग्रता कायम राखेको छ । समानुपातिकमा एमालेले १० लाख ४० हजार १६८ मत पाएको छ ।

नेपाली कम्युनिस्ट पार्टी (नेकपा)ले प्रत्यक्ष सात सिट जित्दा समानुपातिकमा ५ लाख ३४ हजार १५६ मत पाएको छ ।

हर्कराज राईको श्रम संस्कृति पार्टीले प्रत्यक्षमा तीन क्षेत्र सुरक्षित गर्दा समानुपातिकतर्फ दुई लाख ३९ हजार ७२ मत पाएको छ । प्रत्यक्षमा एक क्षेत्र जितेको राष्ट्रिय प्रजातन्त्र पार्टी (राप्रपा)ले समानुपातिकतर्फ दुई लाख ५७ हजार ६ मत पाएको छ । राप्रपा र श्रम संस्कृतिसम्मका पार्टीले थ्रेसहोल्ड कटाउने सम्भावना देखिए पनि समानुपातिकतर्फ अन्य दलले तीन प्रतिशत थ्रेसहोल्ड कटाउने सम्भावना कम बन्दै गएको छ ।

निर्वाचन आयोगले आज दिउँसोसम्ममा प्रत्यक्षतर्फ सबै क्षेत्रको परिणाम सार्वजनिक हुने बताएको छ । समानुपातिकतर्फको परिणाम भने मंगलबारसम्ममा सक्ने योजना आयोगको रहेको विज्ञप्तिमार्फत् जानकारी गराएको छ ।