रवि र बालेनसँग भारतका प्रधानमन्त्री मोदीको संवाद

काठमाडौं । भारतका प्रधानमन्त्री नरेन्द्र मोदीले राष्ट्रिय स्वतन्त्र पार्टीका सभापति रवि लामिछाने र वरिष्ठ नेता बालेन्द्र साहलाई निर्वाचन प्राप्त सफलताका लागि शुभेच्छा प्रकट गरेका छन् । मोदीले सोमबार फेसबुकमार्फत यसको जानकारी दिँदै रास्वपाको निर्वाचन सफलताका लागि दुवै नेतालाई बधाई दिएका छन् ।  
उनले रास्वपाले नेपालमा हासिल गरेको उल्लेखनीय सफलताका लागि लामिछाने र शाहलाई शुभकामना व्यक्त गर्दै आगामी सरकार गठनका लागि पनि शुभेच्छा प्रकट गरेका छन् । भारत सरकार नेपालसँग पारस्परिक समृद्धि, प्रगति र दुई देशका नागरिकको हितका लागि सहकार्य गर्न प्रतिबद्ध रहेको उल्लेख गरेका छन् ।
मोदीले भारत र नेपालबिचको सम्बन्ध आगामी वर्षहरूमा अझ नयाँ उचाइमा पुग्ने विश्वास पनि व्यक्त गरेका छन् । उनले दुवै देशले संयुक्त प्रयासमार्फत द्विपक्षीय सम्बन्धलाई थप मजबुत बनाउँदै लैजाने अपेक्षा व्यक्त गरेका छन् । तर, यो संवादका बारेमा लामिछाने, शाह र उनीहरुको दल रास्वपाले औपचारिक रुपमा जानकारी साझा गरेका छैनन् ।