राज्यले औषधि उद्योगको संरक्षण गर्नुपर्छः प्रभात रुंगटा,  वरिष्ठ उपाध्यक्ष, नेपाल औषधी उत्पादक संघ

एक्सपोमा करिब २१० वटा स्टल छन् । तीमध्ये लगभग ९० प्रतिशत विदेशी कम्पनीका स्टल छन् भने २२ वटा नेपाली कम्पनीले स्टल राखेका छन् । दसौँ संस्करणसम्म आइपुग्दा हलको स्थान सानो भएकाले धेरै कम्पनीले स्टल लिन नपाएको अवस्था पनि देखिएको छ । त्यस कारण धेरै विदेशी प्रतिनिधि उत्पादन, मेसिन र प्रविधिबारे जानकारी दिनका लागि बिना स्टल नै सहभागी भएका छन् । कम्तीमा पनि भारतबाट मात्र करिब तीन सय उद्योगका एपीआई, कच्चा पदार्थ आपूर्तिकर्ता तथा मेसिन आपूर्तिकर्ताहरू उपस्थित भएका छन् । स्टल नराखे पनि उनीहरू कामकाजी रूपमा सहभागी भएका छन् ।
झन्डै पाँच सयभन्दा बढी विदेशी पाहुना तथा पाँच सय कम्पनीका प्रतिनिधि एक्सपोमा सहभागी हुने अनुमान गरिएको छ । यसअघि चितवनमा पनि दुई–तीनवटा एक्सपो आयोजना भएका थिए, जसमा म स्वयं पनि सहभागी भएको थिएँ । त्यसपछि यस दसौँ संस्करणलाई काठमाडौँमा आयोजना गर्ने उद्देश्य राखिएको थियो । चितवनमा सबैको सहज पहुँच नभएको र सहभागिता केही कम भएको गुनासो आएपछि त्यसलाई ध्यानमा राख्दै काठमाडौँमा आयोजना गरिएको हो । दोस्रो दिनसम्म आइपुग्दा काठमाडौँमा आयोजना गर्नु फलदायी भएको स्पष्ट देखिएको छ । यसले औषधि उद्योगीमा नयाँ उत्साह थपेको छ ।
तर, यस सकारात्मक वातावरणका बीचमा केही चुनौती पनि देखिएका छन् । पश्चिमी क्षेत्रको युद्ध, इरान–अमेरिका तनाव, इजरायलको आक्रमण आदिका कारण विश्वव्यापी रूपमा वस्तुहरूको मूल्यवृद्धि भएको छ । धेरै कच्चापदार्थ अभाव देखिएको छ । यस कारण विदेशी प्रतिनिधिले हामीसँग राम्ररी छलफल गर्ने, प्रस्ताव दिने वा कुनै सम्झौता निष्कर्षमा पु¥याउने अवसर पनि पर्याप्त पाउन सकेका छैनन् ।
यस अवस्थामा राज्य, औषधि व्यवस्था विभाग तथा स्वास्थ्य मन्त्रालयले गम्भीर रूपमा ध्यान दिन आवश्यक छ । हाम्रो औषधि उद्योगलाई व्यवस्थापन गर्ने, समर्थन गर्ने र संरक्षण गर्ने खालको प्याकेज ल्याई सम्बन्धित सरोकारवालासँग छलफल गर्नुपर्छ ।