राज्यको सानो सहयोगले औषधि उद्योग निकै बलियो हुनसक्छः सन्तोष बराल, मेला संयोजक एवं महासचिव, नेपाल औषधि उत्पादक संघ

एक्स्पोमा सहभागी सबै औषधि कम्पनी अन्तर्राष्ट्रिय स्तरका छन् । यहाँ आएका कम्पनी प्रायः ल्याब, ल्याब प्रविधिसम्बन्धी मेसिन, केमिकल, प्याकिङ मेटेरियल र औषधि प्याक गर्ने उपकरणका कम्पनी हुन् । त्यस्तै, केही ट्रेडरहरू पनि सहभागी भएका छन् । हाम्रो प्रमुख उद्देश्य भनेको नेपालमा उत्पादन हुने औषधि कसरी बनाइन्छन्, कुन प्रविधि र सामग्री प्रयोग गरिन्छन् भन्ने कुरा देखाउनु हो । साथै, औषधि उद्योगले विगत ३० वर्षमा गरेको प्रगति र प्रयोग गरेको प्रविधि आम जनमानस र नीति निर्मातालाई बुझाउन पनि यो एक्सपो आयोजना गरिएको हो ।
आज पनि हाम्रो नीति क्षेत्र सीमित छ । औषधिमा केही छुट र प्रोत्साहनको व्यवस्था भएको भए पनि पर्याप्त सहयोग देखिएको छैन । हामीले प्रयोग गर्ने र आवश्यक पर्ने कच्चा पदार्थ र प्याकेजिङका लागि आवश्यक सामग्री अधिकांश आयात गर्नुपर्छ । नयाँ औषधि उद्योग खोल्दा ठूलो लगानी गर्दा पनि राज्यको समर्थन सीमित छ । यद्यपि, २५–३० वर्षमा नेपाली औषधि उद्योगले ठूलो प्रगति गरेको छ । पुराना औषधि उद्योगीले आजको उद्योगको आधार निर्माण गरेका हुन् । निजी क्षेत्रले गरेका प्रयासहरूलाई बाहेक, राज्यबाट ठुलो सहयोग कमै देखिएको छ ।
भविष्य उज्ज्वल छ । पहिलो औषधि उद्योगबाट आज करिब ८० उद्योग पुगेका छन् । हामी सामान्य ट्याबलेट र क्याप्सुल मात्र नभई क्यान्सरसम्बन्धी औषधि पनि उत्पादन गरिरहेका छौँ । दुईवटा उद्योग कच्चा पदार्थ उत्पादन गर्न सक्षम भइसकेका छन् । राज्यबाट सहुलियत र सहयोग पाइयो भने उद्योग अझ बलियो हुनेछ ।