रास्वपाका ५७ समानुपातिक सांसदको नाम सिफारिस, आयोगले प्रमाणित नगरेसम्म नाम सार्वजनिक नगरिने

काठमाडौं । राष्ट्रिय स्वतन्त्र पार्टी (रास्वपा) को सचिवालय बैठकले प्रतिनिधिसभातर्फ समानुपातिक सांसदका लागि ५७ जनाको नाम सिफारिस गरेको छ। सिफारिस गरिएकाहरुमा ४८ जना महिला र ९ जना पुरुष रहेका छन् ।

सचिवालयले दिएको जिम्मेवारी अनुसार कर्मचारी र सचिवालय सदस्यमार्फत तोकिएको समयभित्रै आइतबार नै नामहरू निर्वाचन आयोगमा पठाइने पार्टीका प्रवक्ता मनिष झाले जानकारी दिएका छन् ।

उनले भने, “जब हामीले निर्वाचन आयोगको केन्द्रीय कार्यालयमा नाम बुझाउँछौँ, उहाँहरूले रुजु गर्नुहुन्छ र प्रमाणीकरणको प्रक्रिया सुरु हुन्छ। त्यसपछि आयोगले ती नामहरू सार्वजनिक गर्छ। राजनीतिक र कानुनी रूपमा आयोगले प्रमाणित नगरेसम्म ती नामहरू हाम्रो तर्फबाट प्रस्तावित नाम मात्र हुन्छन्।”

फागुन २१ मा सम्पन्न प्रतिनिधिसभा निर्वाचनमा रास्वपाले प्रत्यक्षतर्फ १२५ र समानुपातिकतर्फ ५७ सिट हासिल गरेको जनाएको छ।

क्लस्टरअनुसार प्रस्तावित संख्या यस्तो छ –

खस आर्य – १७ जना

आदिवासी जनजाति – १६ जना

मधेशी – ९ जना

दलित – ८ जना

थारू – ४ जना

मुस्लिम  – ३ जना