नयाँ कथामा ‘महाराजा’

दक्षिण भारतीय अभिनेता विजय सेतुपति अभिनीत चर्चित फिल्म ‘महाराजा’ को  सिक्वल आउने भएको छ । लेखक–निर्देशक निथिलन समिनाथनले दोस्रो भागको कथा तयार गरिरसकेको र आफू त्यो सुन्न आतुर रहेको सेतुपतिले बताएको भन्दै सिनेमासम्बन्धी भारतीय सञ्चारमाध्यमले जनाएका हुन् । निर्माण टोलीका तर्फबाट आधिकारिक घोषणा भने भइसकेको छैन । निर्देशकले दोस्रो भागको कथा तयार गरिसकेको र मुख्य कलाकारस“ग प्रारम्भिक छलफल अघि बढेको खबर बाहिरिएस“गै दर्शकमाझ उत्सुकता छ । पहिलो भागले अप्रत्याशित सफलता हासिल गरेपछि यसको कथा कसरी अघि बढाइन्छ भन्ने चासो छ ।
‘महाराजा’ को पहिलो भाग एउटा साधारण नाईको जीवन वरिपरि घुम्छ, जसको संसार एकाएक अपराध र प्रतिशोधको जालोमा फस्छ । एउटा दुर्घटनामा बाबुछोरीले आफूहरुलाई बचाएको श्रेय एउटा फलामे डस्टबिनलाई दिएका छन्, ‘लक्ष्मी’ नाम दिएर । लक्ष्मी उनीहरुका लागि भगवान सरह हो । घरमा तीन अपरिचित पसे, त्यो फलामे डस्टबिन गायब भयो, खोजीगरिपाउँ भन्दै महाराजा पात्र बनेका सेतुपति प्रहरी चौकीमा पुगेको सामान्य घटनाजस्तो प्रसंगबाट सुरु भएको कथा क्रमशः गहिरो मनोवैज्ञानिक र भावनात्मक तहमा पुग्छ, जहा“ बाबु–छोरीको सम्बन्ध, पीडा र न्यायको खोजी अत्यन्त मार्मिक ढंगले प्रस्तुत गरिएको छ । फिल्ममा विजय सेतुपतिस“गै अनुराग कश्यपको सशक्त अभिनयले कथालाई थप बलियो बनाएको थियो । विशेषगरी सेतुपतिको संयमित र गहिरो अभिनयले दर्शक र समीक्षक दुवैबाट प्रशंसा बटुलेको थियो । 
बराबर आइरहने सिनेमाका कथाको धारभन्दा ‘महाराजा’ फरक थियो । सुरुवात र अन्त्य सामान्य दर्शकको अनुमानभन्दा पृथक शैलीमा प्रस्तुत गरिएको थियो ।   
फिल्ममा अनुराग खलपात्रका रुपमा देखिएका थिए भने छोरीको भूमिकामा सचना नामिदास थिइन । 
रिलिजपछि फिल्मले बक्स अफिसमा उल्लेखनीय व्यापार गरेको थियो । करिब २० करोड भारुको बजेटमा बनेको यो फिल्मले १९० करोड भारु हाराहारीको व्यापार गरेको थियो । फिल्मको प्रचार उतिसारो थिएन तर घरेलु मात्र नभई अन्तर्राष्ट्रिय बजारमा पनि राम्रो आम्दानी गर्दै ‘वर्ड अफ माउथ’ का आधारमा फिल्म लामो समयसम्म हलमा टिक्न सफल भएको थियो । उक्त वर्ष उल्लेख्य व्यापार गरेका तमिल फिल्मको सूचीमा थलपति विजयको ’गट’ ४५६ करोड आम्दानी गर्दै पहिलो नम्बरमा रहँदा ’महाराजा’ चौथो स्थानमा थियो । 
समीक्षकहरूले यसको पटकथा, निर्देशन र अप्रत्याशित मोडहरूलाई उच्च मूल्यांकन गरेका थिए, जसले यसलाई वर्षकै उल्लेखनीय फिल्ममध्ये एक बनाएको थियो ।
अभिनेता विजय सेतुपति दक्षिण भारतीय सिनेमामा फरक भूमिकाका लागि परिचित छन् । व्यावसायिक तथा कलात्मक दुवै धारका फिल्ममा सन्तुलन राख्ने उनको क्षमता र जोखिम लिन सक्ने स्वभावले उनलाई ‘एक्टर’को रूपमा अलग पहिचान दिएको छ ।
अब सम्भावित दोस्रो भागले पहिलो कथाको अन्त्यबाट नयाँ मोड लिन सक्ने अनुमान गरिएको छ । प्रतिशोधपछि पात्रको मानसिक अवस्था, विगतका घटनाले निम्त्याउने कानुनी वा सामाजिक परिणाम वा नयाँ अपराधसँग जुध्नुपर्ने परिस्थिति जस्ता विषयहरू समेटिँदै कथा अझ गहिरो र व्यापक बन्न सक्ने आकलन गरिएको छ । ‘महाराजा’को पहिलो भाग लेखक–निर्देशक निलिथनको करिअरको दोस्रो फिल्म हो । तेस्रो प्रोजेक्टको तयारीमा रह“दा उनले राम्रो दर्शक प्रतिक्रिया पाएका छन् ।
निथिलन दक्षिण भारतीय फिल्म क्षेत्रका प्रतिभाशाली लेखक–निर्देशक हुन्, जो विशेषगरी थ्रिलर र सामाजिक यथार्थ मिसिएको कथावाचनका लागि चिनिन्छन् । उनले कम बजेटमै प्रभावशाली कथा र अप्रत्याशित मोड प्रस्तुत गर्ने शैली विकास गरेका छन् । ‘महाराजा’ मार्फत उनले व्यापक लोकप्रियता कमाउँदै समीक्षकको प्रशंसा बटुले । उनको निर्देशनमा चरित्रको गहिराइ, सस्पेन्स र भावनात्मक तह सन्तुलित रूपमा प्रस्तुत हुने विशेषता पाइन्छ, जसले उनलाई समकालीन नयाँ पुस्ताका निर्देशकमध्ये अलग पहिचान दिलाएको छ । त्यसैले ’महाराजा–२’ को कथा कस्तो ल्याउलान् भन्ने चासो बढेको हो ।