नागरिकका अपेक्षा केन्द्रित काम गर्ने सांसदहरुको प्रतिबद्धता

सिन्धुपाल्चोक । बागमती प्रदेशका १३ जिल्लामध्ये सिन्धुपाल्चोक भौगोलिक रूपमा अलि बढी विकट छ । पहाडी र हिमाली भेग अधिक रहेको यस जिल्लालाई प्राकृतिक विपत्तिहरुले पनि बेला–बेलामा दुःख दिइरहेका छन् । कहिले जुरेको पहिरोले धनजनको क्षति भयो भने कहिले मेलम्चीको बाढी, त ०७२ को विनाशकारी भूकम्प नै किन नहोस् । केन्द्रबिन्दु सिन्धुपाल्चोक नै बनिरह्यो । 
ती घाउका खाटा अझै बसिसकेका छैनन् । धेरै काम गर्नु छ यस जिल्लामा । हालै सम्पन्न प्रतिनिधिसभाको निर्वाचनबाट यस जिल्लाले संघीय संसद्मा दुई जना नयाँ अनुहार पठाएको छ । विगतमा भएका थुप्रै निर्वाचनबाट निर्वाचित प्रतिनिधिहरुले जति काम गरे, शायद नागरिक यसबाट त्यति सन्तुष्ट थिएनन् । त्यसैले यस पटक नयाँ अनुहारसँग आशा राख्दै विजयी गराएर पठाएका छन् । 
यस जिल्लामा तीन वटा नगरपालिका र नौ वटा गाउँपालिका गरी १२ पालिका छन् । सबैजसो पालिकामा विकासका थुप्रै काम गर्न बाँकी छन् । अहिले आएका प्रतिनिधिहरुले जनताको विश्वासलाई जित्दै कामहरु गर्नुपर्नेछ । निर्वाचित प्रतिनिधिहरु पनि आफूले सकेको कामका लागि कुनै कन्जुस्याईं नगर्ने बताइरहेका छन् । 
यस जिल्लाको निर्वाचन क्षेत्र नम्बर १ मा यस पटक राष्ट्रिय स्वतन्त्र पार्टीले जित हात पारेको छ । यहाँ विगतका निर्वाचनहरुमा कहिले नेपाली कांग्रेस त कहिले माओवादी केन्द्रले जित्दै आएका थिए । यो पटक रास्वपाका उम्मेदवार भरतप्रसाद पराजुली विजयी भएका छन् । पराजुलीले २४ हजार ४१२ मत प्राप्त गर्दै निकटतम् प्रतिद्वन्द्वी नेकपाका माधव सापकोटालाई पराजित गरेका हुन् । सापकोटाले १७ हजार ३२७ मत प्राप्त गरेका छन् । पराजुलीले ७ हजार ८५ मतान्तरले जित हासिल गरेका हुन् । सापकोटा यसअघि यो क्षेत्रका विजयी सांसद हुन् ।
निर्वाचित पराजुली सिन्धुपाल्चोकको बलेफी गाउँपालिका–६ का स्थायी बासिन्दा हुन् । स्नातकोत्तर तहसम्म अध्ययन गरेका उनी व्यवसायिक क्षेत्रमा स्थापित व्यक्तित्वका रूपमा चिनिन्छन् । यसअघि नेकपा (एमाले) पृष्ठभूमिबाट राजनीतिमा आबद्ध पराजुली पछिल्लो समय भने राष्ट्रिय स्वतन्त्र पार्टीमार्फत सक्रिय राजनीतिमा प्रवेश गरेका हुन् । 
पराजुली जिल्लाकै जुगल गाउँपालिकामा निर्माणाधीन ४५ मेगावाट क्षमताको ब्रह्मायणी जलविद्युत् आयोजनाका अध्यक्ष पनि हुन् । नयाँ अनुहारका रूपमा उनी विकास, सुशासन र परिणाममुखी राजनीतिलाई प्राथमिकतामा राख्दै सिन्धुपाल्चोक–१ बाट प्रतिनिधिसभा निर्वाचनमा प्रतिस्पर्धामा उत्रिए र जनताले पनि उनलाई विश्वास गरे । संसदीय अनुभव नभए पनि निजी क्षेत्रको लामो अनुभव र व्यवस्थापन क्षमताका कारण उनी फरक पहिचान बनाएका व्यक्तिका रूपमा चिनिन्छन् । सुशासन, भ्रष्टाचारको अन्त्य र परिणाममुखी काम गर्ने प्रतिबद्धता लिएर आफू जनतामाझ पुगेको उनले बताएका छन् । यतिबेला उनी आफ्ना मतदातालाई धन्यवाद दिनका लागि जिल्लाका धेरै भागमा पुगेका छन् । चुनावअघि गरेका प्रतिबद्धतालाई कार्यान्वयन गर्दै अघि बढ्ने उनले बताए । 
यस्तै सिन्धुपाल्चोक क्षेत्र नम्बर–२ बाट प्रतिनिधिसभा सदस्यमा नेपाली कम्युनिष्ट पार्टी (नेकपा) का युवराज दुलाल निर्वाचित भएका छन् । उनले आफ्ना निकटतम प्रतिद्वन्द्वी नेपाली कांग्रेसका वंशलाल तामाङलाई २ हजार ५५३ मतान्तरले पराजित गरेका हुन् । दुलालले २१ हजार ६९९ मत प्राप्त गर्दै विजयी बन्दा तामाङ १९ हजार १४६ मतसहित दोस्रो भए । नेकपा एमालेका शेरबहादुर तामाङ १५ हजार ९२६ सहित तेस्रो स्थानमा रहँदा राष्ट्रिय स्वतन्त्र पार्टीका झलककुमार श्रेष्ठ १४ हजार १९ मतसहित चौथो स्थानमा पुगे ।
दुलाल यसअघि प्रतिनिधिसभा–२ को प्रदेश ‘क’ बाट दुई पटक प्रदेशसभा सदस्य निर्वाचित भइसकेका व्यक्ति हुन् । सिन्धुपाल्चोकको राजनीतिमा युवराज दुलाल नयाँ नाम नभए पनि प्रतिनिधिसभामा भने उनको यो पहिलो यात्रा हो । उनको जीत नेकपाको वागमती प्रदेशमै प्रत्यक्षतर्फ एक मात्र जित हो । यसअघि युवा नेतृत्व र जनमुखी काम गर्ने शैलीका कारण जिल्लामा उनको लोकप्रियता बढेको थियो । उनले प्रदेशसभाबाट राजीनामा दिँदै यसपटकको निर्वाचनमा उम्मेदवारी दिएका थिए ।
सिन्धुपाल्चोकको चौतारा साँगाचोकगढी नगरपालिका–७ मा उनको जन्म भएको हो । ४३ वर्षीय युवा नेता दुलालले स्नातकोत्तर तहसम्म अध्ययन गरेका छन् । उनले बागमती प्रदेश सरकारमा सामाजिक विकास र पूर्वाधार विकास मन्त्रीको रुपमा पनि काम गरिसकेका छन् । यसअघि २०७९ को प्रतिनिधिसभा निर्वाचनमा यस क्षेत्रबाट नेपाली कांग्रेसका मोहनबहादुर बस्नेत निर्वाचित भएका थिए तर यस पटक बस्नेत उम्मेद्वार भएनन् ।
दुलाल जनआन्दोलनको भूमिगत संघर्ष जनमुक्ति सेनाको ‘बिग्रेड कमाण्डर’देखि प्रदेश सरकारको मन्त्रिपरिषद् हुँदै संघीय संसदीय यात्रामा आइपुगेका हुन् । २०५१ सालदेखि अखिल क्रान्तिकारीमा संगठित भई २०५२ सालदेखि माओवादी आन्दोलनमा सक्रिय रहे । उनले पार्टीका विभिन्न जिम्मेवारीहरु निर्वाह गरे । हाल उनी नेपाली कम्युनिष्ट पार्टीका केन्द्रीय सदस्य पनि छन् । प्रदेश तहमा जिम्मेवारी सम्हालिसकेको अनुभवलाई संघीयस्तरमा उपयोग गर्दै क्षेत्र नम्बर २ लाई नमूना विकास क्षेत्र बनाउने लक्ष्य उनले अघि सारेका छन् । उनले यसपटक शिक्षा, स्वास्थ्य, सडक, पूर्वाधारजस्ता आधारभूत अधिकार नागरिकसम्म गुणस्तरीय र सुलभरुपमा दिने एजेण्डा अघि सारेका छन् । संघीय संसद् पुगेर आफ्नो क्षेत्रको विकास र जनआवाजलाई राष्ट्रिय तहमा पु¥याउने उनको प्रतिबद्धता छ । 
युवालाई स्वरोजगार र उद्यमशीलतामा प्रवद्र्धन गर्ने विशेष कार्यक्रम ल्याउने उनले बताएका छन् । वैदेशिक रोजगारीलाई मात्र विकल्प मान्ने प्रवृत्तिमा परिवर्तन ल्याउँदै स्थानीय स्रोत, सीप र सम्भावनाको उपयोगमार्फत रोजगारी सिर्जना गर्ने दुलालको योजना छ । यसअघि आफूले सबै नागरिकलाई समानभाव राखेर काम गरेका कारण अहिले नागरिकले आफूलाई विश्वास गरेको उनको दाबी छ । निर्वाचनको अहिलेको परिणाम अनपेक्षित रहेको बताउने उनी पुराना दलहरु यति धेरै कमजोर होलान् भनेर कल्पना पनि नगरेको अनुभव सुनाउँछन् । तर नागरिकका अपेक्षा पूरा गर्ने चुनौती भने रास्वपालाई रहेको र आफ्नो दललाई भने सुधार हुने अवसर आएको उनको भनाइ छ । 
आफूले अब प्रतिपक्षको सिटमा बसेर नागरिकका आवाज उठाउने र विकास निर्माणका काम पनि योजनाबद्ध रूपमा अघि बढ्ने र काम गर्न सक्ने आत्मविश्वास आफूमा रहेको उनले बताए । जुनसुकै दलबाट निर्वाचित भए पनि जनप्रतिनिधि भइसकेपछि सबैको साझा भएर काम गर्नुपर्छ भन्ने मान्यता राख्ने दुलाल आफूले नीति निर्माण, विकास निर्माण र सुशासनका काममा मात्र ध्यान दिएको बताउँछन् । नागरिकले कामको परिणाम हेरेर मूल्यांकन गर्ने हुँदा अहिले आफूले बोलेका कुराहरु भोलि पूरा गर्न सकिएन भने फेरि अवसर नआउन सक्ने उनको भनाइ छ । आफू हिजो भोट माग्न जाँदा र अहिले निर्वाचित भएर नागरिक भेट्न गइरहँदा पनि नागरिकले आफूमाथि ठूलो भरोसा राखेको आफूले पाएको दुलालले बताए । 
आफू जिम्मेवार प्रतिपक्षमा रहेर अबको ५ वर्ष काम गर्ने, सरकारका राम्रा कामको समर्थन र नराम्रा कामको विरोध गर्दै सधैं जनताकै साथमा रहेर काम गर्ने उनले बताए । कृषि, पर्यटन, सडक, खानेपानी, स्वास्थ्यलगायतका पूर्र्वाधारका काम गर्न आफूसँग पर्याप्त योजना रहेकाले अब ती योजना पूरा गराउनुका साथै मेलम्ची र इन्द्रावती नदीबाट प्रभावित नागरिकलाई विशेष कार्यक्रममा जोड्दै यी नदी किनारामा रहेका नागरिकलाई सुरक्षित बनाएर लैजाने उनले बताए । यी नदीमा करिडोर निर्माणका काममा पनि आफूले काम गर्ने उनको योजना छ । 
के छन् नागरिकका अपेक्षा ?
जिल्ला सदरमुकाम चौताराबाट वरिपरि रहेका पालिका र गाउँबस्तीहरु विकासका थुप्रै सम्भावनाबाट पछाडि छन् । अहिले पनि धेरै पालिकाहरुमा सडक पुग्न बाँकी छ । कृषिका क्षेत्रमा पनि समस्या धेरै छन् । खानेपानी, स्वास्थ्य र शिक्षाका क्षेत्र पनि समस्याग्रस्त नै छन् । घण्टौं हिँडेर खानेपानी लिन जानुपर्ने अवस्थामा नागरिक छन् । 
विकट भूगोल र कमजोर पूर्वाधार भएको सिन्धुपाल्चोकका नागरिक वर्षौंदेखि दोहोरिँदै आएका पुराना दलका चुनावी आश्वासनबाट दिक्क थिए । यसअघि संघ र प्रदेशका निर्वाचनमा उम्मेदवारहरु घोषणापत्र बोकेर गाउँ पुग्ने तर कार्यान्वयन नहुने गरेको स्थानीयको गुनासो छ । यस्तै स्थानीय तहको सीमित बजेटबाट काम भए पनि संघबाट हुनुपर्ने राम्रा कामहरुको अनुभव लिन नपाएका नागरिकहरु अब भने ती दिन भोग्न नपरोस् भन्ने कामना गर्छन् । 
यसपटक पनि सबैजसो दलका उम्मेदवार जिल्लाका दुर्गम बस्तीमा पुगेर सडक स्तरोन्नती, रोजगारी र धार्मिक पूर्वाधार निर्माणका प्रतिबद्धता जनाउँदै फर्किए । जिल्लामा सडक सहजरुपमा सञ्चालनमा नरहेकाले गर्भवती, सुत्केरी र गम्भीर बिरामीहरु अझै जोखिमपूर्ण यात्रामा निर्भर छन् । कतिपय नदी र खोलाहरुमा पुलहरु नहुँदा नागरिकले अकालमै ज्यान गुमाइरहेका छन् । यस्ता समस्याहरुको समाधानका लागि नागरिकले यसपटक मत फेरेका छन् । जसले जिते पनि राम्रो काम होस् भन्ने नै उनीहरुको माग छ । तर जित्ने र हार्ने दुवै पक्ष नमिली विकासका काम अघि बढाउन नसकिने भएकाले सँगसँगै भएर अघि बढ्न नागरिकको सुझाव छ । आगामी दिनमा कसले कसरी काम गर्लान् त्यो भने अपेक्षाकै विषय रहेको उनीहरुले बताए ।