सभापति थापा सानेपा फर्कँदै

काठमाडौं । प्रतिनिधिसभा निर्वाचनमा बेहोर्नुपरेको अनपेक्षित पराजयमा नैतिक जिम्मेवारी लिँदै राजीनामा दिएका कांग्रेस सभापति गगन थापा मंगलबार केन्द्रीय कार्यालय सानेपा फर्कने भएका छन् । फागुन २१ को चुनावी परिणाम पार्टीले अपेक्षा गरेअनुसार नआउँदा उनी राजीनामाको दबाबमा परेका थिए । 

विशेष महाधिवेशनबाट आएको केन्द्रीय कार्यसमितिका पार्टीका शीर्ष पदाधिकारीले लज्जाजनक पराजय बेहोरेपछि थापाको राजीनामाको माग भएको थियो । तर, उनले चैत ३ गते उपसभापति विश्वप्रकाश शर्मालाई राजीनामा बुझाएका थिए । 
थापाले ‘नैतिकता’ का आधारमा राजीनामा दिएको बताएपनि आइतबार सम्पन्न कांग्रेस केन्द्रीय समिति बैठकले त्यसलाई अस्वीकृत गर्ने निर्णय गरेको थियो । ‘निर्वाचनले दिएको परिणामको जिम्मेवारी केवल एक व्यक्तिका रुपमा पार्टी सभापति र विशेष महाधिवेशनबाट चयन भई केवल ५० दिन जिम्मेवारी सम्हालेको केन्द्रीय कार्यसमितिको मात्र नभएर समग्र पार्टीको साझा जिम्मेवारीको विषय रहेको, देशको मौजुदा परिस्थितिमा नेपाली कांग्रेसको सभापतिको रुपमा उहाँले निर्वाह गर्नुपर्ने भूमिकाको आवश्यकता टड्कारो देखिएको र विशेष महाधिवेशनले सुम्पेको दायित्व पूर्ण नभइसकेको वर्तमान अवस्थामा समयमै पार्टीको १५ औं महाधिवेशन सम्पन्न गर्नुपर्ने महŒवपूर्ण जिम्मेवारी समेतलाई मध्यनजर राखी उहाँलाई पूर्ववत् जिम्मेवारीमा फर्किन आग्रह गर्दै यो बैठक सर्वसम्मतिबाट उहाँको राजीनामा अस्वीकृत गर्ने निर्णय गर्दछ,’ बैठकको निर्णय थियो । 
यस्तो निर्णय गरेर आइतबार केन्द्रीय समिति बैठक सम्पन्न गरेको कांग्रेसले त्यसको दुई दिनपछि अर्थात मंगलबार दिउँसो १ बजे पुनः केन्द्रीय समिति बैठक बस्दैछ । उक्त बैठकमा सभापतिका रुपमा थापा पनि सहभागि हुने पार्टी प्रवक्ता देवराज चालिसेले जानकारी दिए । ‘बैठकमा सभापति गगन थापाज्यू पनि सहभागी हुनुहुनेछ । बैठकमा १५औं महाधिवेशनको मिति तोक्ने लगायतका विषयमा छलफल हुनेछ,’ उनले भने । 
थापा गत पुस अन्तिम साता विशेष महाधिवेशनबाट सर्वसम्मत सभापति चयन भएका थिए । उनकै चाहनाअनुसार केन्द्रीय समिति पनि सर्वसम्मत चयन गरिएको थियो । जसलाई निर्वाचन आयोगले मान्यता दिएको थियो भने तत्कालीन संस्थापनपक्षले अदालती चुनौती दिएको थियो । विशेष महाधिवेशनलाई अवैध भन्दै दायर रिट सर्वोच्च अदालतमा विचाराधीन नै छ । पूर्वसंस्थापन पक्षले भने समिति नै अवैध भएकाले त्यसको सभापतिको राजीनामा र त्यसलाई अस्वीकार गर्ने विषयलाई नाटकको संज्ञा दिएका छन् । 
‘कहिले भृकुटीमण्डपबाट सर्वसम्मत भएको घोषणा गर्ने, कहिले ‘अबकी बार गगन सरकार’ भन्ने, त कहिले राजीनामा दिने । यस्ता शृंखलाबद्ध गतिविधिले गगनजीकै कद घटाउँछ र जनतामा भ्रम सिर्जना गर्छ,’ पूर्वसंस्थापन पक्षका नेता मीन विश्वकर्माले भने, ‘राजीनामा दिइसकेपछि अस्वीकृतको नाटक नगर्दा राम्रो । बरु उहाँले राजीनामा स्वीकृत होस् या अस्वीकृत, पार्टी एकताका लागि अग्रसरता लिनुपथ्र्यो । त्यसो हुन नसक्नु दुःखद् छ ।’
चुनावमा पार्टीको लज्जास्पद हारको नैतिक जिम्मेवारी लिँदै सभापति गगन थापाले दिएको राजीनामालाई केन्द्रीय कार्यसमितिले अस्वीकृत गरेपछि उनी पुनः पार्टी काममा फर्कन लागेका छन् । सभापति थापाले केन्द्ीय समिति बैठकमा  १५औँ महाधिवेशनको विस्तृत कार्यतालिका पेस गर्ने तयारी गरेका छन् । कांग्रेसका एक पदाधिकारीकाअनुसार आगामी असोजमा १५औं  महाधिवेशन सम्पन्न गर्ने गरी प्रस्ताव ल्याइँदै छ । 
सभापति थापाले राजीनामा फिर्ता लिएर अघि बढे पनि पार्टीभित्रको आन्तरिक समीकरण भने सहज देखिएको छैन । पूर्वसभापति शेरबहादुर देउवा समूहले हारको जिम्मेवार थापासहितको केन्द्रीय समिति भएको निष्कर्ष आइतबार निकालेको थियो । वर्तमान नेतृत्वलाई चुनौती दिँदै  देउवा र शेखर कोइराला पक्ष पनि छिट्टै केन्द्रीय समिति बैठक बोलाउने तयारीमा छ । यो समूहले पनि उक्त बैठकबाट १५औं महाधिवेशनको मिति तोक्ने भन्दै बैठक बोलाउने जिम्मा पूर्वउपसभापति पूर्णबहादर खड्कालाई दिइएको नेता विश्वकर्माले बताए ।
मंगलबारको बैठकले महाधिवेशनकोे कार्यतालिकालाई कसरी अनुमोदन गर्छ र देउवा पक्षको असन्तुष्टिलाई कसरी सम्बोधन गर्छ भन्नेले कांग्रेसको भावी दिशा तय गर्ने नेताहरु बताउँछन् ।