कर्णालीमा रास्वपा जोगाएका सापकोटा मन्त्री बन्लान् ?

काठमाडौं । देशभर राष्ट्रिय स्वतन्त्र पार्टीको लहर चल्दा कर्णाली प्रदेशमा भने रमेश सापकोटाले पार्टीको बिउ जोगाए । सापकोटा निर्वाचित नभएको भए कर्णाली प्रदेशमा रास्वपा शून्य हुने थियो । तर, सापकोटाले सुर्खेत–२ मा जित्दै आफ्नो संसद् यात्रामात्र तय गरेनन् पार्टीलाई प्रदेशमा शून्य हुनबाट जोगाए । 
रास्वपाका सापकोटा निकटतम प्रतिद्वन्द्वी नेपाली कांग्रेसका नारायण कोइरालालाई पराजित गर्दै निर्वाचित भएका हुन् । उनले ३० हजार ३७८ मत पाएर निर्वाचित हुँदा कांग्रेसका कोइरालाले १६ हजार ९१६ मत मात्रै पाए ।
रास्वपाले फागुन २१ को बहुमत पाएपछि एकल नेतृत्वमा सरकार बनाउँदै छ । वरिष्ठ नेता बालेन्द्र शाह प्रधानमन्त्री बन्ने तय भइसक्दा रास्वपाभित्र मन्त्रिपरिषद्मा क–कसलाई पठाउने भन्नेबारे पनि छलफल जारी छ । सो क्रममा योग्य र विज्ञलाई प्राथमिकता दिने रास्वपाका नेताहरूले बताइरहँदा भूगोलको प्रतिनिधित्व कसरी हुन्छ ? भन्ने विषय पनि चासोका साथ हेरिएको छ । 
नयाँ सरकारमा कर्णालीको प्रतिनिधित्व के हुन्छ भन्ने विषय पनि अहिले चासोमा छ । कर्णालीबाट जित्ने एक्ला सांसद सापकोटा 
अहिले आफूले मन्त्रीबारे नसोचेको र त्यो पार्टीले निर्णय गर्ने विषय भएको बताए । सापकोटाले भने, ‘संसदमा आउनुभएका पार्टीका सबै साथीहरू मन्त्रीका लागि योग्य नै हुनुहुन्छ । पार्टीले जस्तो निर्णय गर्छ, त्यसलाई सम्मान गछौं । पार्टीले जिम्मेवारी दिए त्यसका लागि तयार नै छु ।’ 
रास्वपाले मंगलबार बेलुकासम्म पनि मन्त्रीहरूको नाममा छलफल जारी नै रहेको र बुधबार बेलुकासम्मा टुंगिन सक्ने बताएको छ । उपसभापति डीपी अर्यालले मन्त्रिपरिषद् गठन लगायतका विषयमा पार्टीमा छलफल भइरहेको जानकारी दिए । अहिले छलफल भइरहेको र न्यायोचित रुपमा नै नामहरू छानिने उनको भनाइ छ । ‘अहिले सभापतिज्यू र वरिष्ठ नेताज्यू सरकारमा लैजाने मन्त्रीहरूबारे घनिभूत छलफलमा नै हुनुहुन्छ । छिट्टै टुंग्याउँछौं,’ उपुसभापति अर्यालले भने । बिहीबार सांसदहरूको सपथ हुँदैछ । भोलिपल्ट शुक्रबार शाहले प्रधानमन्त्रीको शपथ लिने र सोही दिन मन्त्रिपरिषद्लाई पूर्णता दिने रास्वपाको तयारी छ । 
पार्टीभित्र ‘राइट म्यान इन राइट प्लेस’ (विज्ञता) को बहस भए पनि भौगोलिक प्रतिनिधित्वलाई पनि बिर्सन नमिल्ने रास्वपाका कतिपय नेताहरू बताउँछन् । ‘रमेशजीले प्रतिकूल अवस्थामा पनि कर्णालीबाट जीत निकालेर पार्टीको बिउ जोगाउनुभएको छ, अब पार्टीले उहाँलाई उचित जिम्मेवारी दिएर न्याय गर्नु उपयुक्त नै हुन्छ,’ रास्वपाका एक नेताले भने । 
रास्वपाबाट प्रधानमन्त्रीमा वरिष्ठ नेता शाह हुने निश्चित हुँदा अरु केही नाम पनि मन्त्रीका रुपमा चर्चामा छन् । उपसभापति स्वर्णिम वाग्ले अर्थमन्त्री, डीपी अर्याल गृहमन्त्री र शिशिर खनाल परराष्ट्र मन्त्री करिब करिब टुंगो लागिसकेको रास्वपा स्रोतको दाबी छ ।
पार्टीले निर्वाचित प्रतिनिधिलाई संसद् प्रवेशअघि दुईदिने अभिमुखीकरणमा राखेको थियो । ‘मिडियामा आफूखुसी नबोल्न र पदको दाबी नगर्न’ उर्दी गरिएपछि पार्टीभित्र नेताहरू सकसमा छन् । ‘बोल्दा आँखी भइने, नबोल्दा आफूमाथि नेतृत्वको नजर नै नपर्ने’ भन्दै सकस भइरहेको हो । प्रतिनिधिसभा निर्वाचनमा निर्वाचित सांसद्हरू यतिबेला सपथ पर्खिँदै काठमाडौंका विभिन्न होटलमा बसेका छन् ।