साम्बाको शल्यक्रिया सफल

न्यूजिल्याण्डको अकल्याण्डमा नेपाली राष्ट्रिय महिला फुटबल टोलीकी प्रभावशाली स्ट्राइकर सावित्री भण्डारी ‘साम्बा’ को घुँडाको सफल शल्यक्रिया सम्पन्न भएको छ । लामो समयदेखिको चोट र प्रतिक्षापछि बुधबार बिहान डाक्टर साइमन र उनको विज्ञ टोलीले यो शल्यक्रिया सफलतापूर्वक सम्पन्न गरेको जानकारी सावित्रीले सामाजिक सञ्जालमार्फत दिएकी छन् । खाडी क्षेत्रमा हाल जारी तनावपूर्ण अवस्थाका कारण कतारको खेल अस्पताल एस्पेटार पुग्न प्राविधिक समस्या भएपछि विशेषज्ञहरूकै सुझाव र समन्वयमा न्यूजिल्याण्डमै उपलब्ध चिकित्सकबाट उपचार प्रक्रिया अघि बढाइएको हो ।
शल्यक्रियापछि अबको महŒवपूर्ण चरण पुनस्र्थापना अर्थात् रिह्याबको काम भोलिदेखि नै डाक्टरहरूको प्रत्यक्ष निगरानीमा सुरु हुने भएको छ । सावित्रीले स्थिति सामान्य हुनेबित्तिकै आफ्नो रिह्याबलाई निरन्तरता दिन पुनः एस्पेटार जाने योजना रहेको बताएकी छन् । यस पीडादायी र चुनौतीपूर्ण घडीमा वेलिङ्टन र अकल्याण्डमा रहेका नेपाली परिवारले दिएको साथप्रति उनले गहिरो आभार प्रकट गरेकी छन् । साथै, आफ्नो क्लब वेलिङ्टन फिनिक्स र व्यवस्थापन टिमले दिनरात मेहेनत गरेर शल्यक्रियाको समय मिलाइदिएकोमा उनले विशेष धन्यवाद दिएकी छन् । आम समर्थकहरूको माया र सद्भावलाई नै मुख्य ऊर्जा मान्दै उनले अबको आफ्नो सम्पूर्ण ध्यान मैदानमा सशक्त पुनरागमन गर्नेतर्फ केन्द्रित रहेको स्पष्ट पारेकी छन् ।
सावित्री भण्डारी नेपाली फुटबल जगतकै एक ऐतिहासिक र सफल खेलाडी हुन् । लमजुङको सामान्य पृष्ठभूमिबाट उठेर उनले दक्षिण एसियाली क्षेत्रकै उत्कृष्ट स्ट्राइकरको पहिचान बनाएकी छन् । सन् २०१४ मा पाकिस्तानमा भएको साफ च्याम्पियनसिपबाट राष्ट्रिय टोलीमा डेब्यु गरेकी उनले नेपालका लागि अन्तर्राष्ट्रिय फुटबलमा सर्वाधिक गोल गर्ने कीर्तिमान आफ्नो नाममा राखेकी छन् । नेपालको एपीएफ क्लबबाट व्यावसायिक यात्रा सुरु गरेकी सावित्रीले भारतीय महिला लिगमा सेथु एफसी र गोकुलम केरलालाई च्याम्पियन बनाउनुका साथै आफूलाई सर्वाधिक गोलकर्ताका रूपमा स्थापित गरेकी थिइन् ।
उनको खेल जीवनको सबैभन्दा ठूलो उपलब्धि युरोपेली फुटबलमा पुग्नु रहेको छ । उनले इजरायली क्लब हापोएल रानाना र फ्रेन्च क्लब ग्वेंगाम्पबाट खेल्दै युरोपेली लिगमा गोल गर्ने पहिलो नेपाली खेलाडी बनेर इतिहास रचेकी छन् । हाल न्यूजिल्याण्डको ए–लिग क्लब वेलिङ्टन फिनिक्समा आबद्ध रहेकै समयमा उनले यो चोटको सामना गर्नुपरेको थियो । यो सफल शल्यक्रियापछि नेपाली फुटबल प्रेमीहरू सावित्रीलाई पुनः मैदानमा गोलको वर्षा गर्दै गरेको हेर्न आतुर रहेका छन् ।